Sie mussen genug Wasser trinken

Eftir langvarandi þurrkatíð á landinu Ísa lét blessuð rigningin sjá sig eitt augnablik í gær og það gladdi mitt litla hjarta.  Ég var nefnilega farin að vorkenna grasinu og trjánum því þau voru algjörlega skrælnuð.  Vökvaskortur er vont ástand hvort sem er fyrir gróður eða mannskepnuna.  Því ætla ég að fjalla lítillega um mikilvægi þess að drekka nóg af vatni daglega.

Tölfræði

Um 60-70% af líkamanum er vatn.

Mannskepnan getur lifað í nokkra mánuði án matar en aðeins í 3 daga án vatns.

Daglega tapar líkaminn 2-3 ltr af vatni frá húð, lungum og nýrum.  Til þess að vinna upp þetta tap þarf venjulegur maður á að drekka að lágmarki 8 glös af vatni á dag.  Annars konar vökvi vinnur ekki eins vel upp vökvatap líkamans og því ætti fólk að drekka hreint vatn í eins miklum mæli og hægt er.  Þeir sem stunda líkamsrækt þurfa að drekka helling af vatni því líkaminn getur tapað 1-2 kg af vatni á einni æfingu.  Missi líkaminn 2% eða meira af líkamsþyngd sinni af vatni hefur það hamlandi áhrif á vöðvastarfsemi. 

Fólk sem æfir ætti að drekka nóg vatn fyrir, á meðan og eftir æfingu.

 

Pissi pissi piss

Ágætis aðferð (en frekar ógeðsleg) til að meta hvort maður drekki nóg af vatni er að athuga litinn á þvaginu.  Ef það er dökkt þá er þörf á meiri vatnsdrykkju en glært þvag bendir til að vatnsneysla sé næg. 

 

Af hverju að drekka vatn?

Hlutverk vatns í líkamanum er margþætt og spilar stórt hlutverk í nánast allri starfsemi líkamans.

Vatn skolar út aðskotaefnum, flytur næringarefni til frumna líkamans, viðheldur réttum líkamshita en líkaminn kælir sig með að losa vatn gegnum svita.

Vatn smyr liði og liðamót sem er mjög mikilvægt fyrir þá sem stunda íþróttir þar sem álag er á liði t.d hlauparar og lyftingafólk.

Við endumst líka lengur á æfingu og erum ekki eins þreytt þegar líkaminn er vel vökvaður.

 

Mikilvægur þáttur í fitubrennslu

Eðlilegur vatnsbúskapur stuðlar að eðlilegri blóðrás og nægt magn súrefnis er í líkamanum en nægt magn súrefnis í blóðrás er mikilvægt til að fitubrennsla eigi sér stað.

Nýrun sjá um að hreinsa vatnið af aðskotaefnum en ef vatn er af skornum skammti þá geta nýrun ekki sinnt þessu starfi eins vel.  Þá kemur lifrin til aðstoðar sem er ekki gott því lifrin sér um að brenna fitu og þegar hún er upptekin við að aðstoða nýrun þá hægist á allri fitubrennslu.

Of lítil vatnsdrykkja leiðir til þess að líkaminn rígheldur í hvern dropa og geymir undir húðinni.  Þá sjást vöðvar ekki eins vel, og sé um verulegan vökvaskort að ræða verðum við þrútin í framan og á fingrum.  Lausnin á þessu er einföld:  Drekka meira vatn því vatn losar vatn... ótrúlegt en satt!!  

 

Mamma!  Ég er þyrstur.

Við eigum ekki að bíða með að drekka þar til við erum orðin þyrst, því þá erum við nú þegar farin að þorna upp.  Þegar við verðum þyrst eigum við að drekka mikið, ekki bara væta kverkarnar.

 

Klósettið er upptekið....næstu klukkutímana

Ef líkamann vantar vatn þá stelur hann vatni úr ristli og afleiðingin er hægðatregða.

 

Er einhver orðinn þyrstur??

 

 

 

 

Athugasemdir

[Ingunn (IP-tala skráð) 20.7.2007 kl. 22:22]

Mikið rétt, en vil samt aðeins minna á að ofvökvun getur haft mjög skaðleg áhrif á líkamann. Þá fara nýrun í overdrive og skola út nauðsynlegum steinefnum og fleiru út með þvagi og yfirkeyra sig. Það gleymist nefninlega oft að minnast á þetta þegar verið er að predika vatnsneyslu og ég hef heyrt um dæmi þar sem fólk er að þamba í sig allt upp í 7-8 lítrum af vatni á dag sem er vægast sagt varhugavert en eins og þú segir þá eru 2-3 lítrar fínt. Það er nefninlega hægt að deyja úr vatnseitrun

[Óla Maja (IP-tala skráð) 20.7.2007 kl. 23:20]

Það er nauðsynlegt að brýna fyrir fólki mikilvægi vatnsdrykkju. Þó að það sé nokkuð til í þessum punkti hjá Ingunni þá held ég að það sé bara ennþá mjög mikið um það að fólk drekki ekki nóg vatn. Ég verð a.m.k. mikið vör við það í kringum mig. Ég fatta ekki hvernig fólk kemst yfir það að drekka 7-8 lítra  Þó ég sé ekkert að efast um að það sé til.. 

Fyrir dálítið mörgum árum las ég grein eftir Einar Guðmann þar sem hann tíundaði mikilvægi vatnsdrykkju og sá lestur hafði mikil áhrif á mig. Síðan þá hef ég lagt mikla áherslu á að passa upp á vatnsdrykkjuna og pisspiss prófið er alveg ágætis mælikvarði  Ég man samt ekki eftir að hafa lesið um þetta með lifrina og nýrun. Ansi áhugavert.

Takk fyrir fræðslu dagsins

[Ragnhildur Þórðardóttir, 21.7.2007 kl. 09:50]

Góður punktur hjá þér Ingunn með ofvökvun því þetta er víst vaxandi vandamál meðal ungra kvenna hérlendis í tengslum við þvagleka. Hann er mun algengari hér á landi en í nágrannalöndunum og læknar telja að það megi rekja til ofpredikunar á vatnsneyslu og ungar stúlkur séu að þamba alltof mikið vatn sem leiði svo til þvagleka.

Það er einmitt svo einfalt Óla Maja að bara rétt kíkja í skálina eftir pisseríið til að tékka hvort nóg sé drukkið.

[Eva (IP-tala skráð) 21.7.2007 kl. 17:51]

Heh ég get svarið það, ég stóð upp og fékk mér vatn :)

[Anna Brynja (IP-tala skráð) 24.7.2007 kl. 11:28]

Já ég varð sko meira en lítið þyrst af þessum lestri.

Farin að fylla á brúsann góða sem víkur ekki frá hlið minni!

Skemmtileg færsla,

Kv. Anna Brynja