Jákvætt hugarfar kemur okkur á áfangastað

 

Naglinn hefur undanfarið mikið velt fyrir sér jákvæðu og réttu hugarfari þegar kemur að þjálfun og mataræði. 
Hugarfarið er nefnilega eina hindrun fólks í að ná árangri og gera hollt mataræði og hreyfingu að lífsstíl.  Margir mikla hlutina svo fyrir sér og hugsa endalaust á neikvæðum nótum, að allt sé svo erfitt og leiðinlegt en þá verður það líka erfitt og leiðinlegt.   

Til dæmis varðandi hollt mataræði, það er auðvelt að grenja yfir því hvað okkur langi í hitt og þetta gúmmulaðið, að við nennum ekki að spá endalaust í öllu sem við setjum ofan í okkur.
En slíkar hugsanir eru bara fyrir aumingja.  Í staðinn eigum við að hugsa um hvað okkur líði vel þegar við borðum hollt og hvað við erum að gera líkamanum og heilsunni gott með því að nota ekki líkamann sem eiturefnaúrgangstransfituruslakistu. 

Naglinn hefur alveg dottið ofan í neikvæða fenið, og svamlaði einmitt í því fyrir nokkrum dögum sem varð til þess að þessar pælingar byrjuðu að brjótast út. 
Þjálfi setti hörkuna átján í mataræði Naglans því honum fannst ennþá vanta mikið upp á. 
Naglanum fannst þetta algjörlega óyfirstíganlegt mataræði og ólýsanlega erfitt allt saman. 
Hugsaði endalaust um hvað hungrið yrði ógurlegt og svekkelsið yfir litlu skömmtunum myndi ríða mér að fullu. 
En svo sló Naglinn sjálfa sig utan undir: " Hættu þessu helv....væli kelling, ef þú hugsar svona þá verður þetta miklu erfiðara en það þarf að vera."
Naglinn sagði við sjálfa sig "How bad do I want this" og "Whatever it takes".

Það er nefnilega hægt þvinga sjálfan sig til að hugsa á jákvæðan hátt um viðfangsefnin og einblína á jákvæðar hliðar þess.  Þegar um ræðir erfiða megrun þá er auðvelt að velta sér endalaust upp úr því hvað þetta sé lítill matur og hvað maður sé nú svangur og hvað lífið sé nú ósanngjarnt. 

Það er líka hægt að girða sig í brók og takast á við verkefnin eins og manneskja, reyna að sjá hið jákvæða sem er hvað það verður gaman að passa í gallabuxurnar eða líta vel út í jólakjólnum eða á sviði á bikiníbrók.  ‘Nothing tastes as good as looking good does'. 

 

Í stað þess að einblína endalaust á hvað það sé leiðinlegt í ræktinni, hvað æfingarnar séu erfiðar og allt svo mikið puð og vesen, þá eigum við að kappkosta að gera hana spennandi fyrir okkur sjálf. 

Til dæmis með því að setja sér alltaf ný og ný markmið.  "Á morgun ætla ég að lyfta 1 kg þyngra eða gera 1 repsi meira eða hlaupa 1 mín lengur en í síðustu viku".   
Það er nauðsynlegt að rækta með sér metnað í ræktinni en ekki vera þar með hangandi hendi mygluð úr leiðindum og bara af því við "verðum" að hreyfa okkur.

Vellíðunar tilfinningin sem fylgir því að ná settum markmiðum er ‘priceless' og þegar við erum ánægð með árangur okkar og/eða útlitið eykst sjálfstraustið og það smitast yfir á önnur svið í lífinu. 

Eins er hægt að setja nýja tónlist á iPodinn, kaupa sér nýjan æfingabol, fá vinkonu eða vin með sér í ræktina.    

Umfram allt að finna leiðir til að gera upplifun sína af heilbrigðu líferni jákvæða og skemmtilega.

Athugasemdir

[Sóley (IP-tala skráð) 15.10.2008 kl. 14:28]

Noting tastes as good as slim feels :-)

[Ragnhildur Þórðardóttir, 15.10.2008 kl. 14:31]

Já vá kannast ég við þessar fullyrðingar.   En að mínu mati snýst þetta bara um sjálfsaga til að byrja með, eftir það er hegðunin að borða hollt og hreyfa sig orðin að vana.  Maður sleppir því ekki að tannbursta sig þó manni finnist það kannski ekkert rosalega skemmtilegt en það er vana-hegðun sem er orðin ósjálfráð.  Það sama ætti að gilda um heilbrigt líferni. Það er nefnilega líf en djamm og hamborgaraát finnst mér eiginlega frekar vera ólifnaður.

[Sandra Dögg Þórudóttir, 15.10.2008 kl. 15:26]

það er líka ótrúlegt hversu mikið manni langar alltaf í það sem maður hefur bannað sjálfum sér að fá sér! fyrir mér á maður ekki að banna sér neitt en viðhalda hollum lífsstíl og þá hættir maður að finna þessa þörf fyrir sætindi og drasl!

[Palli (IP-tala skráð) 16.10.2008 kl. 08:23]

Góður "pep-up" pistill, beint í æð

Nýyrði dagsins; eiturefnaúrgangstransfituruslakista.

[Stína (IP-tala skráð) 16.10.2008 kl. 09:14]

Flottur pistill Ragga, frábært pepp! Nákvæmlega það sem við þurfum öll

[Kári Harðarson, 16.10.2008 kl. 09:40]

Gangi þér vel Ragga!

[Nanna (IP-tala skráð) 16.10.2008 kl. 11:00]

Ef manni finnst leiðinlegt í ræktinni á maður bara að breyta til! maður á aldrei að pína sig í eitthvað leiðinlegt...  Persónulega finnst mér næstum allt skemmtilegt í ræktinni, finnst bara unaðslega tilfinningin að vera eins og sveitt svín nóg - sama hvað ég geri...

Sendi þér orkustrauma núna á endasprettinum, hlakka ekkert smá til að vera með ykkur þarna baksviðs að éta súkkulaðirúsinur ;)

[Guðrún Emilía Guðnadóttir, 16.10.2008 kl. 19:51]

Hef verið að segja þetta við fólk, en sumir virðast ekki skilja um hvað þetta snýst, og það um það, mér gengur bara vel.
Knús Milla

[Palli (IP-tala skráð) 17.10.2008 kl. 13:22]

Sæl, ég er búinn að vera að velta fyrir mér rækjum... Hver er afstaða vaxtarræktarkappans gagnvart rækjum? Eru þær ekki svipaðar og fiskur, hollt og gott?

[Ragnhildur Þórðardóttir, 20.10.2008 kl. 19:48]

Palli! Rækjur eru ekki besti prótíngjafinn, þær eru hræætur, og háar í kólesteróli. Fiskur og skelfiskur eru betri kostur. Rækjur allt í lagi af og til, en ekki sem megin prótíngjafi.