Óviðeigandi hegðun í ræktinni

Naglinn hefur séð ýmislegt í ræktinni í gegnum tíðina.
Má þar nefna fjölbreyttan klæðaburð, nýstárlegar æfingar, sérkennileg hljóð og aðra tilburði.

En aldrei hefur Naglinn orðið vitni að því að fólk mæti með börnin sín í salinn á æfingu.

Undanfarna daga hefur maður mætt í ræktina með drenginn sinn sem er c.a 6 - 8 mánaða gamall, stillt honum upp við lyftingabekk og farið svo að pumpa sjálfur. Drengurinn er látinn hanga á bekkbrúninni tottandi snuðið og pabbinn sinnir honum síðan á milli setta.
Það tók svo steininn úr þegar hann notaði drenginn sem mótstöðu í kviðæfingum.

Getur svonalagað verið leyfilegt? Stöðin hlýtur að vera með einhverjar reglur um börn í lyftingasalnum.

Eitt er að koma ræktinni inn "no matter what" en fyrr má nú aldeils fyrr vera.
Naglinn veltir fyrir sér hvort ekki megi flokka slíka meðferð á drengnum undir barnaverndarmál, því þarna er verið að setja hann í lífshættulegar aðstæður. Hvað ef einhver missir lóð ofan á barnið, eða hrasar um það með lóð í höndunum? Hann gæti hæglega kramist til dauða undir einni 20 kg lóðaplötu.

Naglinn hefur sent manninum hneykslunaraugnaráð og tekið eftir augngotum frá öðrum ræktarrottum hversu óviðeigandi öllum þykir þetta atferli mannsins.

Athugasemdir

[Anna María (IP-tala skráð) 14.4.2009 kl. 17:32]

Hvernig er það í Danaveldi, er ekki barnagæsla í líkamsræktarstöðvum? Mér finnst þetta alveg fyrir neðan allar hellur, einmitt í ljósti slysahættu eins og þú bendir á. Mér finnst að starfsfólk stöðvarinnar eigi að taka fyrir svona.

Ég hef reyndar aldrei séð svona en í WC í Hfj. þá er barnahornið inn af salnum og engin gæsla sem slík, bara herbergi sem krakkarnir geta leikið sér í. Þar eru stundum krakkar að þvælast fram til að leita að foreldrum sínum og það finnst mér einmitt ekki viðeigandi, þau eru ekki mikið að velta fyrir sér hvort einhver sé með lóð á niðurleið akkúrat þegar þau ganga undir. Reyndar er þetta ekki algengt og foreldrar oftast duglegir að fara með þau aftur í krakkaherbergið.

[Bjarney Bjarnadóttir, 14.4.2009 kl. 22:20]

Ég hef séð hérna á Íslandi þegar par mætti með krakkann sinn, nokkurra mánaða, í burðarstólnum og plantaði honum uppá lyftingabekk, og burðarstóllinn datt svo niður af bekknum Svo sé ég líka oft fólk með börnin sín inní lyftingasalnum þegar barnagæslan er lokuð, krakkarnir bara á vappinu í kringum foreldra sína á meðan þau lyfta, og mér finnst foreldrarnir oft ekki vera að spá í hvort krakkinn sé að fikta í tækjunum í kring! Ég er reyndar algjör gribba og bendi fólki yfirleitt á að tækjasalurinn sé ekki fyrir börn, en bendi þeim jafnframt á að ég sé með þeirra hag í huga..!

[Óli Jóns (IP-tala skráð) 15.4.2009 kl. 08:08]

Barnapössun í líkamsræktarstöðvum er algjör snilld, en lenti í því miður skemmtilega atviki fyrir nokkrum vikum að gleyma ipodinum heima og þá var það eina sem glundi í eyrunum stefið úr Línu Langsokk sem var spilað óhemjuhátt úr barnasalnum og öðrum til varnaðar þá sómar það sér ekki vel sem undirspil í deadi.

En Ragga, hefur þú einhver tips fyrir meðal Jóninn hvernig hægt er að ná meiri breidd á brjóstkassann? Finnst eins og eina stækkunin sem að ég tek eftir er í þykkt...

[Ragnhildur Þórðardóttir, 15.4.2009 kl. 10:56]

Já ókei, Helgi tók af mér tækifærið til að svara. En eins og hann segir réttilega þá kemur víddin, þetta X shape sem vaxtarræktarmenn hafa, frá lötsunum. Upphífingar eru langbestar til að bæta í massann á lötsunum og þar með breikka þá, fókusaðu vel á negatífuna, stjórnaðu henni - ekki láta bara gossa niður. Svo eru einangrandi æfingar eins og niðurtog með undirhanda eða þröngu gripi mjög góðar fyrir neðri hluta latsana (rhomboids) sem viðbót.

[Ragnhildur Þórðardóttir, 15.4.2009 kl. 11:52]

Anna María! Það er barnapössun í einhverjum stöðvum, en ég held að það sé ekki í þessari ákveðnu stöð. Það er í annarri sem ég fer oftar í, en hún er bara opin seinnipartinn samt. Algjör kryppa og staurfótur í gangi :-/

[Óli Jóns (IP-tala skráð) 15.4.2009 kl. 13:00]

Þúsund þakkir

[................................... (IP-tala skráð) 21.4.2009 kl. 01:13]

Ég æfi yfirleitt í lítilli stöð og oft eru foreldarnir að leyfa börnunum að leika sér á upphitunartækjunum. Ekki ósjaldan sem maður sér krakka nánast hendast af hlaupabrettinu eða þá að missa stjórnina á cross trainernum. Ég hiklaust segi börnunum að þetta sé bannað og ef foreldrarnir skipta sér af þá bendi ég þeim á það sem stendur áberandi stöfum inni í stöðinni. Salurinn er bannaður börnum undir 14 ára.

[Ragnhildur Þórðardóttir, 21.4.2009 kl. 16:24]

Helgi! No worries... takk fyrir þitt innlegg.

Nafnlaus! En hvað segja starfsmenn stöðvarinnar um það að börnin séu að príla á tækjunum ?