Franskar,sósu og salat...

Var að lesa frétt í Sirkus um að fitnesskappinn Arnar Grant hafi verið í 10-11 að kaupa sér pakka af hamborgurum og brauði og verið að hneykslast á því að heilsufrík eins og hann borði hamborgara.  Svona hlutir fara ótrúlega í taugarnar á mér, og mér finnst alveg fáránlegt að þó einhver hugsi um heilsuna, æfi eins og skepna alla daga vikunnar og passi mataræðið að hann megi þá ekki leyfa sér eitthvað gómsætt af og til án þess að það kosti að Gróa á Leiti fari á stjá.   Ég hef svo oft fengið að heyra ótrúlegar spurningar "Haa, borðar þú súkkulaði?? Ég hélt að þú værir öll í hollustunni".  Einu sinni á nammidegi var sagt við mig "Vá hvað þú borðar mikið, ég vissi ekki að þú gætir borðað svona mikið".  Ekki skipti ég mér af því hvað annað fólk setur upp í sinn munn og finnst það ná út yfir allan þjófabálk að þurfa að svara fyrir það hvað maður lætur ofan í sig, hvort það er kjúklingur og brokkolí á virkum degi eða hamborgari og súkkulaði um helgar. 

Í fyrsta lagi þá þá erum við heilsufríkurnar ekki bragðlaukalaus vélmenni sem getum borðað kál og kjúkling alla daga vikunnar og langar aldrei í neitt gott.  Í öðru lagi eigum við  það skilið að "hygge os" í mat og drykk eftir allt púlið og puðið.  Í þriðja lagi kemur manns eigin mataræði engum við, og á ekki að birtast á síðum dagblaða.  Í fjórða lagi höfum við heilsufríkurnar milljón sinnum meira efni á því að sukka pínu í mataræðinu heldur en næsti maður. Síðast en ekki síst þá er "hjemmalavet" hamborgari bara alls ekkert óhollur með réttu áleggi.....og hananú.

Góða helgi og gleðilegan nammidag....í friði.

Athugasemdir

[Ingunn (IP-tala skráð) 29.6.2007 kl. 14:18]

Hehe...ég veit upp á mig skömmina...var það ekki ég sem kom með eitthvað svona bjánalegt komment á þig einu sinni Annars var það nú alls ekki út af því ég var eitthvað hneyksluð....aðallega bara hissa því ég svosem sé þig sárasjaldan borða og var bara einhvernvegin búin að gera mér eitthvað allt annað í hugarlund En auðvitað eigið þið heilsufríkurnar miklu meira skilið en við sukkararnir að splæsa á ykkur þegar ykkur langar til...eigið það sko alveg inni og meira til. Maður er bara svo vitlaus og einhvern vegin gerir oft bara ráð fyrir einhverju þó það eigi sér enga stoð í raunveruleikanum...sjáið nú ekki bara hvernig umræðan um mótorhjólafólk hefur verið...erum við ekki öll útúrdópaðir ökuníðingar og glæpamenn hehe
En allavega þá afsaka ég hér með þetta fáránlega komment mitt og skal aldei gera þetta aftur

[Ragnhildur Þórðardóttir, 29.6.2007 kl. 14:50]

Þessu var nú ekki beint til þín elskan mín.  Það hafa svo ótalmargir aðrir bombað á mig heimskulegum athugasemdum um átvenjur mínar að þú myndir ekki trúa því.  Fórum einu sinni með pabba á hlaðborð og hann skildi ekki hvernig kona með svona fuglsmaga gæti borðað jafn mikið og tveir meðalstórir karlmenn.  Svo flokkast þú líka sem heilsufrík, en ekki sukkari, því þegar fólk æfir og passar mataræðið eins og þú þá flokkast það sem frík !!Fólk alhæfir svo mikið að það er óþolandi, og einmitt gott dæmi er öll umræðan um mótorhjólaliðið.  ALLIR mótorhjólamenn fá kikk útúr að stinga lögguna af og spæna upp malbikið og ALLIR sem æfa éta bara þurran kjúkling og brokkolí ALLTAF.

[Sunna Hlin (IP-tala skráð) 1.7.2007 kl. 22:40]

AMEN !!!:D

[Anna Brynja (IP-tala skráð) 3.7.2007 kl. 13:46]

Þetta var ein sú allra hallærislegasta EKKI frétt sem ég hef nokkurn tímann augum litið! Heilsufríkur eru líka fólk hi hi hi hi hi