90% reglan

Ein af stærstu hindrunum í fitutapi er skortur á fylgni við mataræðið, að halda sig við planið. Þú verður að halda þig við planið ef þú vilt að það virki, ekki satt? Það var enginn að segja að það yrði auðvelt. Það eru augljósar fórnir.

Það er ástæða fyrir því að ekki fleiri ganga um með öfundsverðan líkamsvöxt, þetta er erfitt.
En með því að plana vel, fylgja planinu og temja þér sjálfsaga geturðu byggt upp þinn besta líkama.

Áður en þú getur mælt gagnsemi hvaða prógrams sem er þarftu að íhuga hversu vel þú ert að fylgja því.
Fylgdirðu því, eða bara svona hálfpartinn fylgdirðu því? Án þess að fylgja því algjörlega geturðu ekki skýrt útkomuna.
Tengdist skortur á árangri mataræðinu? Misstirðu úr margar máltíðir? Breyttirðu máltíðum? Svindlaðirðu oft?
Við getum ekki gert breytingar til að tækla stöðnun án þess að upphaflega planinu hafi verið fylgt algjörlega eftir.

Mikilvægasti hlekkurinn í langtímaárangri er að fylgja planinu eftir. En hvað getur talist árangursrík eftirfylgni í mataræði? Töfratalan er 90%. Ef þú fylgir planinu 90% af tímanum eru líkur á árangri mjög háar.
En því meiri árangri sem þú vilt ná ættirðu að stefna að því að borða hollt meira en 90% tímans.
Það segir sig sjálft að því betur sem þú fylgir planinu eftir því meiri verður árangurinn.

Fitutap kemur fyrst og fremst í gegnum mataræði.
Lyftingar og brennsluæfingar eru mikilvægar breytur í prógramminu en eru langt á eftir mataræði hvað mikilvægi varðar. Hversu marga hefurðu séð hamast og djöflast í ræktinni en breytast ekkert frá ári til árs? Hvað er þetta fólk að gera hina 23 tíma dagsins? Það er eitthvað sem hefur áhrif á árangur þeirra og þú getur verið viss að það er eitthvað sem fer upp í munn og ofan í maga.

Flestir sem spurðir eru hversu vel þeir séu að fylgja planinu segjast vera duglegir, en er það alltaf raunin? Sjálfsblekking er nefnilega ansi sterkt fyrirbæri.
Hvað með þessar tvær máltíðir sem þú misstir úr í vikunni? Hvað með súkkulaðimolana á miðvikudagskvöldið? Teygðist ekki nammidagurinn yfir alla helgina líka?

Það er auðvelt að blekkja sjálfa(n) sig og halda að maður sé rosalega dugleg(ur), en þegar allt kemur til alls ertu kannski bara að borða hollt og rétt 75% af tímanum.
Lítið svindl hér og þar virka ekki svo hræðileg ein og sér en lítið + lítið + lítið er ekki lengur lítið heldur safnast saman yfir vikuna og verða stórt atriði sem hamlar árangri.

Ef þér finnst árangurinn standa á sér og þú ert undir 90% viðmiðinu ertu með svarið fyrir framan þig. Þú þarft einfaldlega að vera duglegri í mataræðinu.

Athugasemdir

[þrúður (IP-tala skráð) 27.10.2008 kl. 14:34]

eins og talað út úr mínum munni hversu oft heldur maður að allt sé í góðu lagi en gleymir að telja aukabitana eða  svindlar smá en núna er ég af fullum krafti að reyna að fara 90 % eftir prógrammet og það er vel að virka. kveðja Þrúður                    

[Íris (IP-tala skráð) 27.10.2008 kl. 15:29]

takk fyrir þennan pistil, nákvæmlega það sem ég þurfti núna, smá spark í rassinn hehe :)

[Mama G, 27.10.2008 kl. 17:22]

Teygðist ekki nammidagurinn yfir alla helgina líka?

Meira svona löng helgi sem byrjar á fimmtudegi og endar á miðvikudegi hérna megin

En hey, ég er búin að vinna mig niður í eingöngu súkkórúsínur + prótein bars sem nammi, kemst þótt hægt fari. Annars er nammi ekki svo mikið vandamál í mínu lífi, meira bara svona fitandi matur sem ég borða

[Palli (IP-tala skráð) 28.10.2008 kl. 09:03]

Hvoru megin við 90 % falla rækjur? eru þær hluti af þessum duglega 90 eða slöppu 10. Heyrði að þær gætu verið slæmar fyrir æðakerfið, er eitthvað til í því heldurðu?

[Ragnhildur Þórðardóttir, 28.10.2008 kl. 09:54]

Þrúður! Það er þokkalega að virka hjá þér, þvílíkur árangur í síðustu mælingu

Júlíus! Það er ótrúlegt hvað maður getur blekkt sjálfan sig fram og til baka og verðlaunað sig jafnvel fyrir ömurlega viku

Mama G! Það er nú stórt skref að vera búin að kötta nammið niður. Til hamingju með það.  Hitt kemur með kalda vatninu.

Palli! 90% reglan á meira við um matarplan og máltíðir en ekki einstaka fæðutegundir.  Rækjur geta alveg verið partur af góðu mataræði en í hófi þó, því eins og ég sagði um daginn þá geta þær hækkað kólesteról og eru því ekki góður kostur t.d fyrir þá sem eru þegar með of hátt kólesteról.

[Soffía Sveinsdóttir (IP-tala skráð) 28.10.2008 kl. 09:58]

Stundum tekur á að lesa færslurnar þínar (á jákvæðan hátt)!  Maður er jú blekkingarsnillingur og það sem þú skrifar er oft svooo satt. Það er drullu erfitt stundum að horfast í augu við sannleikann - EN les þetta samt því það er svo ótrúlega gott að láta minna sig á....

[Ragnhildur Þórðardóttir, 28.10.2008 kl. 10:48]

Þetta eru góðar fréttir fyrir Palla, þó að þetta séu auðvitað bara niðurstöður einnar rannsóknar og ber því að taka þeim með fyrirvara. Athugaðu samt Palli að þeir könnuðu ekki áhrif rækjuáts á fólk með hátt kólesteról. Ef þú ert í gúddí með það þá, eins og ég sagði, ættu rækjur að vera í lagi í hófi.

[Guðrún Helga (IP-tala skráð) 28.10.2008 kl. 12:12]

Hæ Ragga.  90% reglan virkar vel fyrir mig því að ég þoli ekki nammi daga, er þunn daginn eftir og treð meira í mig en mig langar í því að það er "nammi dagur".  Ef maður borðar 6 litlar máltíðir á dag 7 daga vikunnar þá eru það samtals 42 máltíðir ekki satt.  Samkvæmt því mætti maður "svindla" 4 sinnum eða hvað segir naglinn um það?

Sástu að þrekmeistaranum hefur verið frestað nú þegar 10 dagar eru í mót... Afsökunin er m.a að það vanti styrktaraðila.... ég hélt að í fávisku minni þyrfti bara einn íþróttasal og 20 tæki til þess að halda mótið + staff til að telja.

[Ragnhildur Þórðardóttir, 28.10.2008 kl. 12:59]

Hæ Guðrún Helga,

Já þessi hugmynd að setja máltíðir vikunnar upp í hnitakerfi er m. a komin frá næringarfræðingi sem heitir John Berardi og það leyfir 4 máltíðir af 42 til að ná 90%. En eins og segir í pistlinum því nær 100% því meiri árangur og 90% er ALGJÖRT LÁGMARK. Að mínu mati eru 4 máltíðir í viku alltof mikið, sérstaklega þar sem fólk borðar yfirleitt langtum meira en það á að gera fyrir eina "frjálsa" máltíð. Þess vegna ættu flestir sem vilja ná árangri að stefna á allavega 95%.

[Ragnhildur Þórðardóttir, 28.10.2008 kl. 13:01]

P.S Fáránlegt með Þrekmeistarann!! Vonandi að þeir fari nú ekki að fresta bikarmótinu líka.....