Bloggfærslur mánaðarins, apríl 2007

30. apríl 2007

Fyrri æfing: 55 mín brennsla á skíðavél og þrekstiga.  Þrjár kviðæfingar, 3 x 12-15

Sófakartöflur gleðjist

ist2_809061_couch_potatoÞessi frétt er tekin af heilsuvef BBC.

Haldiði að það verði munur í framtíðinni þegar þetta lyf verður komið í hverja sjoppu.  Líkamsræktarstöðvar munu sjálfsagt allar verða gjaldþrota með tilkomu þessa lyfs því það mun engum heilvita manni detta í hug að blása eins og búrhveli, þrammandi á hlaupabandi innan um annað sveitt og illa lyktandi fólk sem andar frá sér fuglaflensu út í loftræstikerfið. 

Í stað þess að styrkja hjarta- og æðakerfið með þrotlausum þolæfingum, og styrkja vöðva og bein með linnulausum lyftingum, verður nóg að bryðja pillu og hlamma sér svo í sófann með stútfullan nammipoka úr Hagkaup og glápa á imbann. 

Hins vegar verður blússandi bissness hjá heilbrigðisstéttinni, í að sinna öllum þeim sem hafa þróað með sér of háan blóðþrýsting, áunna sykursýki, kransæðasjúkdóma og fleiri lífsstílssjúkdóma vegna hreyfingarleysis.  Sjúkraþjálfarar munu eflaust fá sinn skerf af kökunni, því einhver þarf að sinna öllum þeim sem munu eiga við stoðkerfisvandamál að stríða.  Rýrnaðir vöðvar og lin bein sökum vannotkunar munu þá verða lífsstílssjúkdómar framtíðarinnar. 

Já það verður sko sældarlíf hjá mörgum með tilkomu þessa nýja lyfs!!! 


Killer brennsla

Fyrst að ég var að blaðra um lotuþjálfun hér um daginn er ekki úr vegi að koma með hugmyndir að nokkrum killer brennslulögum fyrir lagasvampinn (iPod-inn):

Paradise by the Dashboard light (Meatloaf)- Átta mínútur af brjálaðri keyrslu sem fer alveg í botn í lok lagsins

Holding out for a hero (Bonnie Tyler)- "....and he's gotta be larger than life"

Poison (Alice Cooper)- Eðal 80's rokk 

Livin' on a prayer; You give love a bad name; Keep the faith (Bon Jovi)- Þessi þrjú lög með 80's hjartaknúsaranum fá mann til að taka vel á því

Betri tíð; Sigurjón Digri; Taktu til við að tvista (Stuðmenn)- Mann langar helst til að taka smá mjaðmasveiflu úti á gólfi, tvista tvista tvista jejejejeje 

Killing in the name of (Rage against the machine)- Maður verður illa aggressífur með þetta í eyrunum, en ég brenni best í þeim ham

Paradise City; Welcome to the jungle (Guns n' Roses)- Axl Rose á´tónleikum á pungbindi með tóbaksklútinn um hausinn.... need I say more?? 

Footloose (Kenny Loggins)- "Everybody cut everybody cut, everybody cut, everybody cut"

Du hast (Rammstein)- Þýskt gæðarokk klikkar aldrei

 

Endilega komið með hugmyndir að fleiri góðum brennslulögum í kommentakerfið.

 Gleðilegan föstudag


Þau ættu að skammast sín!!

Mikið er ég fegin að tilheyra ekki lengur Þjóðkirkjunni sem stjórnað er af þröngsýnum afturhaldsseggjum, sem neita að horfast í augu við veruleikann og ættu að skammast sín fyrir yfirlýsingar sínar um "eingöngu hjónaband manns og konu" kjaftæðið úr Biblíunni.  Þetta er algjörlega aftan úr grárri forneskju og engan veginn í takt við þau nútíma viðhorf sem viðgangast manna á meðal í samfélaginu. 

Samkynhneigðir eru viðurkenndur þjóðfélagshópur í íslensku samfélagi, og megum við vera stolt af því að réttindabarátta þeirra hérlendis hefur skilað miklu. 

En betur má ef duga skal, og þessir forpokuðu hempukallar á Húsavík ætla greinilega að standa í vegi fyrir því.   


mbl.is Tillaga um hjónavígslu samkynhneigðra felld
Tilkynna um óviðeigandi tengingu við frétt

Hreinn Loftsson....where are you?

Fór í spinning í morgun sem er ekki í frásögur færandi nema fyrir þær sakir að tíminn var troðfullur og loftræstingunni verulega ábótavant, ef hún var þá yfir höfuð í gangi.  Það var svo heitt og mollulegt í salnum að það láku af mér fleiri, fleiri lítrar af svita, og eftir tímann voru fötin mín svo rennandi blaut að það leit út eins og ég hefði farið í sund eða blautbolakeppni í þeim.  Það er held ég fátt óþægilegra en að labba heim í meðvindi með rennandi blautan rass.

En þessar raunir mínar úr spinning í morgun eru hjóm eitt samanborið við þau skilyrði sem starfsmönnum í göngum Kárahnjúkavirkjunar er boðið upp á þessa dagana. 

Þar er loftið svo mikill viðbjóður að fullhraustir menn verða veikir á örfáum dögum og fá einkenni astma og andþyngsli.  

Gríðarlegur hiti er þarna niðri, og loftið mengað af drullu og óþverra.  Grundvallarmannréttindi eins og hreint drykkjarvatn er ekki á boðstólum, og sleikja menn veggina til að svala þorsta sínum.  Það er kannski ágætt að þeir séu ekki að drekka of mikið vatn því enginn staður er í göngunum til að kasta af sér þvagi og saur.  Sem getur þó orðið hvimleitt vandamál þegar menn fá bæði uppköst og niðurgang af matnum sem þeim er boðið upp á. 

Ætli það sé festur þvagleggur, stómapoki og ælupoki á verkamennina áður en þeir fara niður í göngin??

Það er spurning hvort það ætti að prófa að hafa einn spinningtíma í göngunum við Kárahnjúka og sjá síðan hvort fólk kvarti jafnmikið yfir lélegu loftræstingunni í Hreyfingu.


Af hverju ekki nammidagar með ZERO bumbu??

Alltaf jafn gaman á mánudögum, eða þannig....Rassinn er heldur sunnar en hann var fyrir helgi, og bumban skríður yfir buxnastrenginn.  Franska súkkulaðikakan og fleiri ljúffengar veitingar í matarboðinu runnu einum of ljúflega niður á laugardagskvöldið.  Að sjálfsögðu tók græðgin öll völd eins og vanalega og það var nartað svolítið í leifarnar á sunnudaginn yfir síðasta þættinum af Prison Break. Hann endaði nú ekki alveg nógu vel fyrir Scofieldinn minn.  Nú bíður maður bara spenntur hvort að það komi ekki 3. sería, allavega gaf endirinn það til kynna.

Ég skráði mig til keppni í Þrekmeistaranum í morgun, svo nú verður allt gefið í botn enda ekki nema 12 dagar til stefnu.  Ég verð hæstánægð með að bæta tímann minn frá því í haust, en annars ætla ég ekki að vera með neinar yfirlýsingar um hvert takmarkið er, því þá lít ég bara illa út ef það næst ekki.

Armbeygjurnar eru ennþá slappar hjá mér, en þessir spaghettí handleggir mínir linast bara upp eftir 15-20 armbeygjur og geta bara ekki meir nema að hvíla smá stund.  Þetta fer ekki lítið í taugarnar á mér og ég þrjóskast bara á móti þar til ég get ekki meir Angry.   

Hins vegar hef ég bætt mig talsvert bæði á róðravélinni og á þrekhjólinu en eftir að ég byrjaði að æfa í Klassanum hef ég tekið þessi tvö tæki á hverjum degi.  Vonandi vinna þau á móti slappleikanum í armbeygjunum Blush.


Fitness og Þrekmeistarinn....not the same thing

Skrýtin tilviljun en um síðustu helgi spurðu mig tvær manneskjur hvort ég hefði verið að keppa í fitness um páskahelgina.  Báðar höfðu þær ruglað saman Fitness og Þrekmeistaranum, og af því tilefni vil ég útskýra nánar hvað felst í þessum tveimur keppnum og muninn á þeim. 

Í Fitness er farið í gegnum hindranabraut, og í sumum keppnum keppa konur sín á milli í armbeygjum og karlar í upphífingum og dýfum. 

Síðan er samanburður þar sem kvenkyns keppendur koma fram á bikiníi og/eða sundbolum og karlar á sundskýlum.  Dómarar meta bestu líkamsbyggingu keppenda út frá skurði, brúnku, samræmi milli hægri og vinstri/efri og neðri skrokk, og fleiru sem ég kann ekki að segja frá.Í Þrekmeistaranum er keppt í 10 greinum í kapp við klukkuna. Greinarnar eru eftirfarandi:HjólRóðravélNiðurtogFótalyfturArmbeygjurUppstigUppseturAxlapressaHlaupabrettiBekkpressaEkki eru gerðar kröfur um líkamsbyggingu né klæðaburð í Þrekmeistaranum.  Fólk má þess vegna keppa í jólasveinabúning, næpuhvítt og með aukakíló, svo lengi sem það er í góðu formi og getur klárað brautina á sæmilegum tíma.  Ef einhver sprengir sig í miðri braut þá verður hann að hætta keppni ef sá sem var ræstur á eftir honum nær honum inni í brautinni.  Það er því nauðsynlegt að vera í góðri þjálfun fyrir Þrekmeistarann og passa að sprengja sig ekki í byrjun keppni.Ég vona að fólk átti sig nú á muninum á þessum tveimur keppnum en ég stefni semsagt á keppni í Þrekmeistaranum þann 5. maí n.k. 

Offita-part 2

Svo ég blaðri nú enn meira um offitu, en ég var að lesa viðtal í Sirkus ónefndan pólitíkus  Hann kom víst í Kastljós um daginn ásamt Geir H.  Haarde og einhverjum fleirum pólitíkusum og hann þurfti að sitja í öðruvísi stól af því hann passaði ekki í hina. 

Er það ekki ágætis vísbending um að menn þurfi að grenna sig þegar panta þarf sérsmíðuð húsgögn fyrir þá? 

Hann segir í viðtalinu að hann sé við hestaheilsu, en þó honum líði ekki illa þá er svona mikil yfirþyngd mjög hættuleg heilsunni. 

Í fyrsta lagi er offita ein og sér er til dæmis sjálfstæður áhættuþáttur fyrir hjartasjúkdóma. Það kom í ljós í hóprannsókn Hjartaverndar að því hærri sem þyngdarstuðullinn (BMI) er því meiri líkur á dauðsföllum úr hjarta og æðasjúkdómum. 

Svo er mikil hætta fyrir fólk í yfirþyngd að fá áunna sykursýki, kæfisvefn og ýmis stoðkerfisvandamál.

Þó manninum líði ekki illa líkamlega og finnist hann vera stálhraustur, þá getur samt ýmislegt verið að gerast í skrokknum sem hann er ekki meðvitaður um. 

Algengar afleiðingar offitu og ofþyngdar eru hækkaður blóðþrýstingur, hækkuð blóðfita, hækkað kólesteról og allir þessir þættir auka verulega líkur á hjarta-og æðasjúkdómum eins og kransæðastíflu og hjartabilun. 

Hár blóðþrýstingur er líka yfirleitt einkennalaus og fólk veit ekki af því fyrr en við reglubundið eftirlit hjá heimilislækni að hann sé orðinn of hár. 

 

Fólk á því að taka offitu sína alvarlega og gera eitthvað í málunum. 

Af viðtalinu að dæma virtist téður náungi ekki hafa uppi nein plön um að minnka mörinn.

 

Það kom líka fram í viðtalinu að hann hefði borðað einn banana um morguninn og síðan ekki neitt fyrr en um kvöldið. 

Svona máltíðamynstur er náttúrulega bara út úr kortinu. 

Þegar líður of langt milli máltíða hægist á brennslunni, og líkaminn rígheldur í fituforðann en notar í staðinn prótín úr vöðvavef fyrir orku. 

Þegar borðað er óreglulega fellur blóðsykurinn niður í rassgat sem gerir það að verkum að fólk verður svo hungrað og máttlaust líkaminn öskrar á sykur því það er skjótfengnasta orkan, en hvítur sykur skilar sér mun hraðar út í blóðið en aðrar fæðutegundir, og því fær fólk sér mjög oft sælgæti til að ná upp blóðsykrinum og þrótti. 

Einnig er hætta á að næsta máltíð verði mun stærri en æskilegt er, sökum hungurs, og líkaminn nær ekki að nýta þá orku, sérstaklega ef þessi stóra máltíð er á kvöldin, eins og oft vill verða.  Umframmagn hitaeininganna breytist þá í fituvef.

 

Mælt er með að fólk borði smáar máltíðir á 2-3 klukkutíma fresti yfir daginn til að halda blóðsykri og insúlíni í jafnvægi og halda hungri í skefjum.

 

Það er ekki í tísku lengur að vera svangur.

 

Góða helgi gott fólk!!

 

 


Laugar...here I come

Það hljóp aldeilis á snærið hjá Naglanum í gær.  Fór í Mekka líkamsræktar (a.k.a World Class) og ætlaði að kaupa mér mánaðarkort sem nota bene kostar heilar 10 þúsund krónur, en ég var alveg búin að réttlæta þau fjárútlát fyrir sjálfri mér.  Þegar ég rétti afgreiðsludömunni debetið spyr hún mig að þar sem hún sjái að ég sé í Vörðunni, hvort ég vilji ekki nýta mér tilboðið þeirra á 3 mánaða korti á 15.500 fyrir Vörðufélaga.  Að sjálfsögðu vidli ég það, svo nú mun Naglinn hrista skankana bæði í Laugardalnum og Faxafeninu næstu 3 mánuðina.  Já, Landsbankinn sér um sína.  

Tók svo hrikalega fótaæfingu í Laugum í gær, og notaði fullt af nýjum tækjum sem ekki eru í Hreyfingu, eins og ólympíska fótapressu, Hack squat vélina, og fótacurl ein í einu.  Það voru greinilega einhverjir vöðvar í fótunum vaktir upp af værum blundi sem ekki hafa verið virkjaðir lengi, því þær gráta í dag.....sem er gott.

Ég er ótrúlega sátt við þessa fjárfestingu mína, enda fann ég það í gær hvað það er gott að breyta um umhverfi, sjá ný andlit og nota ný tæki.  Þegar maður æfir 2x á dag alla daga vikunnar í sömu stöð, þá er nánast garanterað að maður fái leið á stöðinni. Það getur smitast út sem leiði á æfingunum og þá er hætta á að maður nenni ekki lengur á æfingu.

Fór reyndar í morgun í Hreyfingu í spinning sem er á þriðjudögum og fimmtudögum en ég er alveg háð þeim enda frábærir tímar.  Þvílík brennsla og ekki þurr þráður á manni eftir tímann. 


Timing is everything

Mikið er gott að vera komin aftur í rútínulífið eftir frídagana, æfa, borða, sofa á réttum tímum.  Ég var alveg í vímu í gær eftir að hafa komist aftur 2x á dag í ræktina og í mitt venjulega mataræði.  Þá fór ég að velta því fyrir mér hvað reglubundið líferni veitir mér gríðarlega hugarró.  Líf mitt er mjög rútínubundið og lífsstíll minn krefst gríðarlegrar skipulagningar.  Yfirleitt er ég búin að plana margar vikur fram í tímann hvenær ég æfi, borða, hvíli mig o.s.frv. og geri yfirleitt aldrei neitt nema að velta því fyrir mér lengi og vega og meta kosti og galla áður en ég tek ákvörðun.  Allt sem ég geri er nefnilega ákveðnum tímalegum skilyrðum háð.  Tímasetningar eru mjög mikilvægar í mínu lífi, eiginlega svo mikilvægar að það jaðrar við áráttu-þráhyggju og gerir mig að mjög takmarkaðri og hreinlega leiðinlegri manneskju. 

Til dæmis get ég ekki farið í bíó nema um helgar.  Í fyrsta lagi get ég ekki farið í bíó kl. 18 því þá er kvöldmatartími.  Í öðru lagi þarf ég að vera farin að sofa fyrir kl. 22 á kvöldin til að geta vaknað kl. 5.30 á morgnana til að brenna.  Átta tíma svefn er lágmark fyrir mig.  Það má samt alls ekki breyta svefntímanum og fara til dæmis að sofa kl 23 eftir bíó og vakna kl. 6.30 til að brenna því þá riðlast allt matarprógrammið yfir daginn um heilan klukkutíma.  Um helgar opnar ræktin ekki fyrr en kl. 8 og þá er í lagi að fara aðeins seinna að sofa og því hægt að fara í bíó kl. 20. 

Ég get ekki borðað kvöldmat seinna en kl 19.30 því það verða að líða allavega 2 tímar frá því ég borða þar til ég fer að sofa.  Það mega heldur ekki líða meira en 2 tímar frá máltíð að æfingu. 

Yfir vikuna borða ég bara mat sem ég elda sjálf og því er ekki hægt að fara út að borða eða í matarboð í miðri viku, bara um helgar þegar er nammidagur og þá bara ef ég hef ekkert svindlað yfir daginn. 

Ég á mjög erfitt með að fara í löng frí því þá riðlast æfinga og matarprógrammið, og ég verð helst alltaf að geta komist í ræktina á þeim stað sem ég er.  Ég á líka mjög erfitt með að gista á hótelum, og vil frekar vera í íbúð með eldhúsi því ég verð helst að geta eldað minn hafragraut og mínar eggjahvítuommilettur.  

Stundum skil ég ekki alveg hvernig Snorri minn nennir að vera með svona takmarkaðri og uppskrúfaðri konu, sem getur bara farið í bíó og út að borða á ákveðnum dögum, en hann er nú svosem orðinn vanur þessu. 

Eins og sést á þessum pistli þá ætti ég kannski betur heima á stofnun þar sem ég klæðist hvítum jakka með löngum ermum sem ná aftur fyrir bak. 


Næsta síða »

Höfundur

Ragnhildur Þórðardóttir
Ragnhildur Þórðardóttir

Hér læt ég gamminn geysa um ýmislegt sem tengist hreyfingu, heilbrigðum lífsstíl og hollu mataræði í formi pistla og fróðleiks.  Mín lífsviðhorf eru að góð heilsa er gulli betri og að í hraustum líkama býr heilbrigð sál. 
Ég tek einnig að mér fjarþjálfun.

Allar upplýsingar um fjarþjálfun á www.ragganagli.com

Spurt er

Hvað gerirðu margar brennsluæfingar á viku?

Nýjustu myndir

  • front-plank-exercise
  • binge_barbie
  • sleep-deprived
  • phpwWI9BvAM
  • eating too much

Aðrir vaðlarar

Bækur

Góðar bækur

  • Bók: A Thousand Splendid suns
    Khaled Hosseini: A Thousand Splendid suns
    Frábær bók en jafnframt mjög átakanleg. Þurfti að loka henni nokkrum sinnum og jafna mig því lýsingarnar á heimilisofbeldinu voru einum of grafískar fyrir minn smekk.
    *****
  • Bók: Kite runner
    Khaled Hosseini: Kite runner
    Algjör snilld. Fjallar um tvo drengi í Afganistan í kringum 1970 áður en allt fór til fjandans þar í landi.
    *****
  • Bók: On beauty
    Zadie Smith: On beauty
    ***
  • Bók: Espresso tales
    Alexander McCall Smith: Espresso tales
    Framhald af 44 Scotland Street. Er að lesa hana núna.
  • Bók: 44 Scotland Street
    Alexander McCall Smith: 44 Scotland Street
    Gerist í Edinborg og þvílík nostalgía sem ég fæ við að lesa þessa bók enda kannast maður við alla staðina sem fjallað er um.
    ****
  • Bók: The time traveller's wife
    Audrey Niffenegger: The time traveller's wife
    Með betri bókum sem ég hef lesið. Falleg ástarsaga um mann og konu sem þurfa að díla við tímaflakk mannsins.
    ****
  • Bók: We need to talk about Kevin
    Lionel Shriver: We need to talk about Kevin
    Hugleiðingar móður fjöldamorðingja um áhrif uppeldis og erfða. Mjög athyglisverð lesning, sérstaklega fyrir þá sem hafa áhuga á "nature-nurture" deilunni.
    *****

Heimsóknir

Flettingar

  • Í dag (28.3.): 6
  • Sl. sólarhring: 7
  • Sl. viku: 41
  • Frá upphafi: 548849

Annað

  • Innlit í dag: 6
  • Innlit sl. viku: 39
  • Gestir í dag: 6
  • IP-tölur í dag: 6

Uppfært á 3 mín. fresti.
Skýringar

Innskráning

Ath. Vinsamlegast kveikið á Javascript til að hefja innskráningu.

Hafðu samband