Offituvandi barna og unglinga

Offita barna og unglinga er vaxandi vandamál hjá vestrænum þjóðum, og Íslendingar eru þar engin undantekning. 

Samkvæmt nýlegri rannsókn Brynhildar Briem næringarfræðings eru tæp 20% níu ára skólabarna of þung og 5% of feit. Offita hefur sömu afleiðingar hjá börnum og fullorðnum, eins og hár blóðþrýstingur, hærra kólesteról og blóðfita, hjarta- og æðasjúkdómar, sykursýki, sjúkdómar í beinum og liðum, svefntruflanir og kæfisvefn. En offita barna hefur að auki skaðleg áhrif á beinvöxt þeirra og þroska. 

Nú til dags hanga börn inni hjá sér allan liðlangan daginn eftir skóla, með ferköntuð augu límd við skjáinn í tölvuleikjum.  Þessi kyrrseta barna á stærstan þátt í þeim vaxandi offituvanda barna og unglinga sem blasir við þjóðinni. Í mínu ungdæmi var farið út og hamast í marga klukkutíma kvöld eftir kvöld, líka á veturna, í eina krónu, yfir, snú-snú, skotbolta og hvað þetta hét allt saman.  Það þótti glatað að hanga inni hjá sér enda vildi enginn missa af fjörinu. 

Ég hef ekki orðið vör við einn einasta krakka  úti að leika í mínu hverfi frá því við fluttum þangað árið 2004.  Snorri sá hins vegar nokkra krakka í boltaleik í götunni okkar um daginn og honum varð svo um að hann keyrði næstum því á. 

Það er því ekki skrýtið að þeir sem búa í grennd við leikvelli borgarinna séu orðnir svo vanir þögninni sem þar ríkir, að loksins þegar heyrist í ærslafullum börnum að leik að þá hringja þeir á lögregluna. 

Kvartað yfir háværum unglingum