Páskaeggjaát framundan

Það fer í taugarnar á mér að heyra auglýsingar eins og er í gangi núna á Bylgjunni fyrir fitubrennsluefnið Hydroxycut.  Þar er lagt upp með að þú þurfir ekki að fitna um páskana, því Hydroxycut kemur í veg fyrir að þú fitnir.  Hvernig getur eitthvað duft í hylki úr fabrikku í Norður-Ameríku komið í veg fyrir að maður fitni?  Slíkar skyndilausnir eru sagðar auka grunnbrennslu líkamans þannig að hann brenni fitu hraðar, en ekki hefur enn verið vísindalega sýnt fram á að þetta gerist í raun og veru. 

Auglýsingin er sett upp á blekkjandi hátt þar sem neytandanum er talin trú um að með því að gleypa Hydroxycut dufthylki um páskana geti hann slafrað í sig páskaegg númer 7 frá Nóa án þess að bæta grammi af fitu á mjaðmir og rass.   Það er sorglegt hve margir gleypa við svona yfirlýsingum eins og nýju neti, rýkur út og kaupir dollu af Hydroxycut dýrum dómum.  Svo situr fólk eftir með sárt ennið og feitari rass, súkkulaði út á kinn og hálftóma Hydroxycut dollu (og hálftóma buddu).  Eins leiðinlega og það hljómar þá er ekkert sem kemur í veg fyrir að við fitnum af páskaeggjaáti en mun ódýrari leið (og sem virkar) til að losna við eggið af rassinum er að hreyfa sig bara meira í næstu viku. Við eigum þess vegna alls ekki að neita okkur um páskaegg um helgina, við sem hreyfum okkur reglulega eigum það þokkalega skilið.

Gleðilega páska! 

Athugasemdir

[Ólöf (IP-tala skráð) 5.4.2007 kl. 00:48]

AMEN  Svo mikið satt og rétt. Við erum alltaf svo föst í einhverjum skyndilausnum og töfrakúrum. Ætlum alltaf að redda öllu án þess að þurfa að leggja neitt á okkur. Finnst einmitt málið vera að það er í góðu lagi að leyfa sér eitt og annað á meðan það er bara stundum og í hófi - og á meðan við hreyfum okkur reglulega þá er enginn skaði skeður

Langar líka að segja þér að ég er líka alveg innilega sammála þér í sambandi við börnin og inniveruna. Mér finnst þetta orðið alltof áberandi og mjög sorgleg staðreynd. Ég man líka að ef að einhverri ástæðu þurfti að "straffa mann" eða refsa fyrir eitthvað þá var það versta refsingin að fá ekki að fara út til að leika sér. Það var bara agalegt