Ég hugsa, þess vegna borða ég kolvetni og ég hugsa af því ég borða kolvetni

Ég hef margoft predikað á þessari síðu um nauðsyn góðrar og hollrar næringar og þess að borða 5-6 máltíðir með reglulegu millibili yfir daginn. 

Nú langar mig aðeins að fjalla um mikilvægi þess að borða kolvetni.  Kolvetnissnauðir megrunarkúrar hafa verið áberandi undanfarin misseri.  Slíkir kúrar hafa stuðlað að þyngdartapi á ógnarhraða, en hversu mikið af þessu tapi var fita og hve mikið var vatn, vöðvar og glýkógen?

Bensínlítill bíll kemst ekki mjög langt og alveg eins og bíll þarf bensín til að flytja okkur milli staða þarf líkaminn eldsneyti til að starfa eðlilega og djöflast í ræktinni.  Kolvetni er uppáhalds orkugjafi    líkamans.

Við meltingu breytast kolvetni í glúkósa eða fitu.  Glúkósi er meginorkugjafi líkamans og hann er einnig notaður til að búa til forðabúr líkamans sem er glykógen í lifur. Líkaminn geymir u.þ.b 200 g af glúkósa í vöðvum og 90g í lifur.  Glýkógenforðinn í lifur er eingöngu fyrir heilann og er ekki snertur þegar vöðvar eru að vinna.   Þegar nóg er til af glúkósa og glýkógeni er umfram kolvetnum breytt í fitu.  

 Í langvarandi föstu klárar líkaminn fyrst glúkósa úr vöðvum.  Síðan sundrar hann glýkógeni í lifur í glúkósa til að nýta sem orkugjafa.  Aðeins þegar allur glúkósi er uppurinn í lifur og vöðvum er fitan nýtt sem orkugjafi fyrir miðtaugakerfið.  En það ástand varir ekki lengi því heilinn gengur eingöngu fyrir glúkósa og getur ekki nýtt fitu sem orkugjafa.  Miðtaugakerfið krefst einnig glúkósa með fitu sem orkugjafa.   Þá hefst hið óvinsæla ferli að umbreyta vöðvaprótínum í glúkósa til að sjá heila og taugakerfinu fyrir orku og afleiðingar þessa ferlis eru eins og við vitum vöðvarýrnun. Líkaminn er forritaður til þess að losa sig við vöðva því þeir eru eðlisþyngri og orkufrekari en fita, en þegar hungursneyð er yfirvofandi vill skrokkurinn gera allt til að spara orkubúskapinn.

Það er mikilvægt að borða kolvetni eftir æfingu því þá vill líkaminn endurnýja tómar glýkógenbirgðirnar. 

Það prótín sem við neytum nýtist ekki til að byggja upp vöðva ef glykógenbirgðir eru lengi tómar því þá nýtir líkaminn prótínið frekar til myndunar glúkósa.

 Semsagt, kolvetni eru vinir þínir. 

Pössum bara að velja réttu vinina.

Athugasemdir

[Bjarney Bjarnadóttir, 6.7.2007 kl. 15:11]

Ég er svo fegin að sjá aðra predika þetta! Það er endalaust basl að vera að sannfæra fólk um að kolvetni eru nauðsynleg eftir kolvetnahræðsluáróður síðustu ára!! Síðan kemur fólk til manns á æfingu, búið að háma í sig prótein og sneiða hjá kolvetnum eftir fremsta megni, og er bara algjörlega orkulaust og pirrað í skapinu! Svo að við tölum nú ekki um vökva- og vöðvatapið sem þessi kolvetnasvelti valda. En eins og ég segi, gaman að sjá að það eru fleiri að predika þetta og líka hversu vel þú útskýrir þetta, trúi ekki öðru en að fólk skilji núna af hverju kolvetni eru mikilvæg og hætta þessari kolvetnafóbíu 

[Ragnhildur Þórðardóttir, 6.7.2007 kl. 16:40]

AMEN!! Takk fyrir stuðninginn í þessari baráttu.  Mikið er gott að heyra að þú predikir þetta ofan í þína kúnna.  Ekki veitir af að upplýsa almúgann eftir Atkins kjaftæðið tröllreið öllu.  Hvernig ætlar fólk að geta tekið almennilega á því á æfingu ef engin orka er til staðar og skrokkurinn í bullandi ketósuástandi með tilheyrandi andremmu og vindgangi. Við ættum kannski að stofna kolvetnavinafélagið . 

[Óla Maja (IP-tala skráð) 6.7.2007 kl. 18:31]

Ojá, ojá, ojá.. MJÖG þarfur pistill  Ég eignaðist bókina Kvenlíkami fyrir lífið um síðustu jól en fram að því hafði ég bara óljóst heyrt um "góð" og "slæm" kolvetni en vissi mjög lítið um það hvað flokkaðist sem gott eða slæmt í þeim efnum. Ég lærði semsagt ýmislegt um það í þessari ágætu bók og þú bættir svo í þann þekkingarbrunn hjá mér um daginn  

Eins og þið segið báðar, þú og Bjarney, þá er búið að hamra svo á þessu með kolvetnin.. að þau séu öll slæm og að við eigum bara að hætta að borða kolvetni og hlaða í okkur próteinum á fullu til að byggja upp vöðvana. Tek undir með Bjarneyju að þú útskýrir þetta mjög skilmerkilega. Þó ég hafi verið komin með það nokkuð á hreint hvað væri gott kolvetni og að ég þyrfti að borða það eins og prótein þá vissi ég samt ekki AF HVERJU.. Nú veit ég það  Thanks to you

Takk enn einu sinni og eigðu góða helgi

[Eva (IP-tala skráð) 6.7.2007 kl. 19:25]

Já maður er einmitt einn af þeim sem heyrir að kolvetni er bara djöfullinn sjálfur og maður á að halda sig langt frá þeim. Ekki gætiru sagt okkur þessu ófróðu hvað eru holl kolvetni ?

 Takk fyrir góð svör

Og góða helgi

Kv Eva 

[Ragnhildur Þórðardóttir, 6.7.2007 kl. 19:32]

Sæl Eva,

Skal skrifa pistil um hvaða kolvetni eru góð og hver ekki. Á meðan þú bíður geturðu kíkt á pistil frá 15. júní hér á síðunni.

Góða helgi skvísurnar mínar!!!

[Sigurður Andri Sigurðsson, 7.7.2007 kl. 11:31]

Er búinn að vera að lesa síðuna þína núna í dágóða stund.  Ég er einn af þeim sem að er alveg ráðviltur í öllu þessu kolvetnid, prótín, fæðubótarefnatali.  En ég er aðeins byrjaður að sjá ljósið þökk sé þér.   

Núna ert þú kominn inní bloggrúntinn, hlakka til að lesa meira. 

[Helga (IP-tala skráð) 7.7.2007 kl. 23:51]

Frábær pistill.  komin með nóg af þessu kolvetnis hræðsluáróðri.