Pumpaðar í drasl

Naglinn heyrði á tal nokkurra unglingsstúlkna í ræktinni. Þær voru að pumpa bíseppinn með léttustu lóðunum sem var auðvitað alltof létt svo þær sveifluðu járninu og minnstu munaði að Naglinn fengi eitt slíkt tvinnakefli í hausinn. Ein þeirra var nú samt með 5 kg og hinar voru fjólubláar af hneykslan og húðskömmuðu greyið vinkonuna. Baneitraðar athugasemdir dundu á aumingja stúlkunni: "Ég ætla sko ekki að verða mössuð, þess vegna lyfti ég bara létt. Ég skil ekkert í þér að vera að lyfta svona þungt. Þú verður alltof stór og vöðvuð." Hvenær ætla kynsystur mínar að átta sig á að við höfum einfaldlega ekki hormónabúskapinn í að verða vöðvatröll. Ekki nema að þær séu með bílfarma af vaxtarhormónum og rasskinnarnar fullar af sterasprautum verða þær ekki eins og trukkabílstjórar á einni nóttu með því að lyfta þungt. Við kvenpeningurinn erum því miður þannig af guði gerðar að það tekur okkur óratíma af lyftingum og gríðarlegt magn af mat til að bæta á okkur kjöti. Ef það væri nú bara jafn auðvelt og þessar skvísur halda að verða massaður með því að lyfta þungt þá væri Naglinn líklega á stærð við einbýlishús. Þessar gellur gætu hins vegar fengið fallega vöðva, fallegar línur og brennt meiru yfir daginn ef þær voga sér að pumpa meira en 5 kg lóðin. Var einmitt að ræða þetta við einn einkaþjálfara í World Class um daginn sem sagðist vera orðinn svo þreyttur á að útskýra það sama fyrir hverri einustu konu sem kæmi í þjálfun til sín....þið verðið ekki massatröll á því að lyfta!!! Konur! Hættið þessu kjaftæði og takið almennilega á því.

Athugasemdir

[Nanna (IP-tala skráð) 10.3.2008 kl. 19:51]

Heyrheyr!!!!

[Eva (IP-tala skráð) 10.3.2008 kl. 21:12]

Já er alltaf að heyra þetta sjálf. Sjálf tek ég frekar þungar þyngdir og finnst það eiginlega bara gaman. En er alls enginn massi Stelpur eru eitthvað svo svaðalega hræddar við að verða massi. Ég tek sjálf eftir því að sumar eru að sveifla kg lóðinu fram og tilbaka..

Vöðvar eru foxy allavega þessir litlu sem við fáum 

[Óla Maja (IP-tala skráð) 10.3.2008 kl. 21:45]

Nei ég skil heldur ekki þessa ofsahræðslu við að verða "massaður". Ég lyfti engum rosalegum þyngdum en horfi öfundaraugum á þá sem það gera (konur jafnt sem karla) og ætla mér að komast þangað. Ég tek massaða kroppa fram yfir horaða og slappa eða þykka og slappa... anyday.

Hvað segir Naglinn annars um rauðvínsdrykkju? Á orðið rosalega auðvelt með að neita mér um kók og sælgæti, kökur, sósur og allt svona "bras".. en mér finnst ógurlega gott að fá mér 1 og 1 rauðvínsglas.. Er ég að skjóta mig í fótinn með svoleiðis?

[Ragnhildur Þórðardóttir, 11.3.2008 kl. 09:04]

Eva og Óla Maja! Nákvæmlega!! vöðvar á konum eru bara sexý, og konur sem þora að taka almennilega á því eru mestu töffararnir .

Óla Maja! Nei, þú ert ekki að skjóta þig í fótinn með einu og einu rauðvínsglasi.  Það er meira að segja fullt af andoxunarefnum og sagt að það sé gott fyrir hjarta og æðakerfið .  Mundu bara að það er mikið af sykri í víni og í hverju grammi af alkóhóli eru 7 hitaeiningar.  Eitt glas öðru hvoru skiptir engu máli, en þegar glösin eru orðin 2-3 á hverjum degi sem má fara að hafa áhyggjur . 

[Sesselja Fjóla Þorsteinsdóttir, 11.3.2008 kl. 09:40]

Er stanslaust að reyna að leiðrétta þetta mál við konur.....gengur samt hægt.

[Óla Maja (IP-tala skráð) 11.3.2008 kl. 10:22]

Takk elsku Naglinn minn.. og skál

[Ragnhildur Þórðardóttir, 13.3.2008 kl. 10:38]

Glæsilegt að heyra.  Bara töffarar sem lyfta þungt .