Hvað er ég að gera rangt?

 

Hvað er ég að gera rangt?

Að ná árangri getur verið nógu erfitt, án þess að hjakka alltaf í sama farinu og eyðileggja fyrir sér í ræktinni með sömu mistökunum árið inn og út.

 

• 1) Að hafa ekki áætlun/prógramm. Það þýðir ekki að ráfa stefnulaust um salinn og fara bara í einhver tæki, til dæmis bara af því þau eru hlið við hlið. Við þurfum að vera búin að ákveða rútínu rútínu áður en við svo mikið sem stígum fæti í ræktina. Á að taka efri hluta, neðri hluta, einn líkamshluta? If you fail to plan, you plan to fail.
• 2) Að hafa ekki plan B. Það er ekkert meira frústrerandi en þegar einhver er að nota tækið sem við ætluðum að djöflast í. Ef við höfum plan B tryggir að þú eyðir meiri tíma að æfa og minni tíma í pirring. Ef einhver er að nota brjóstpressuna? Ekkert mál, þú gerir bara armbeygjur í staðinn. Er einhver í fótapressunni? Shit happens, þú gerir bara framstig í staðinn. Skilurðu?
• 3) Ekki nægileg ákefð. Því miður má oft sjá meiri hörku á boccia æfingum eldri borgara en hjá sumum ræktarmeðlimum. Ákefð er einn stærsti þátturinn til að ná árangri. Ef þú ert að lyfta 12 reps þá áttu að vera að biðja um miskunn á 10. repsi. Ef þú getur auðveldlega gert 15 reps ertu að lyfta kettlingaþyngd og átt að þyngja. Lóðin EIGA að taka í, þetta er ekki prjónanámskeið.
• 4) Of langar hvíldir. Ef markmiðið er að losa um hnoðmörinn á lærum og rassi og halda sér helskornum er nauðsynlegt að hafa hvíldirnar stuttar. 30-60 sekúndur er alveg nóg. Hættu öllum kjaftavaðli milli setta, saumaklúbbar eru fyrir slúður, í ræktinni tökum við á því.
• 5) Allur hreyfiferillinn er ekki nýttur. Alltof algengt er að sjá fólk taka hnébeygjur bara hálfa leið niður, eða fara aðeins hálfa leið með stöngina í bekknum. Í slíku hálfkáki erum við ekki að þjálfa allan vöðvann og árangurinn verður eftir því. Notum allan hreyfiferilinn í öllum æfingum til að ná hámarks árangri. Það fer líka betur með öll liðamót
• 6) Of mikið af brennsluæfingum. Brennsluæfingar eiga að vera viðbót við skothelt næringar- og lyftingaprógramm. Við eigum ekki að eyða megninu af tímanum hangandi eins og hundur á roði á þrekstiganum og spæna þannig upp massann með of löngum brennsluæfingum.
• 7) Leita ekki aðstoðar fagmanns. Hvers vegna hafa allir fremstu íþróttamenn þjálfara? Af því þeir vita að þeir nái lengra með aðstoð þeirra en upp á eigin spýtur. Einkaþjálfari getur vísað veginn að settum markmiðum, við lærum rétta líkamsstöðu, rétta tækni, repsafjölda, hraða, hvíldartíma, og rétta blöndu af æfingum. Öll þessi vitneskja hjálpar okkur að ná hámarks árangri og lágmarkar pirring og frústrasjón.

 

Athugasemdir

[Hjörtur Hjartarson (IP-tala skráð) 13.6.2008 kl. 12:30]

Góður pistill

skemmtileg mynd! 

[Snjólaug (IP-tala skráð) 13.6.2008 kl. 12:34]

Já, ég hef aldrei pælt í þessum með plan B, ég reyni bara að fara þegar það eru ekki margir ... enda er best að fara í ræktina á sólardögum á sumrin

[Ragnhildur Þórðardóttir, 13.6.2008 kl. 13:32]

Hjörtur! Takk fyrir það.

Snjólaug! Plan B er nauðsynlegt sérstaklega á álagstímum, en ég er svo sammála að besti tíminn til að æfa er akkúrat núna þegar allir fresta æfingu vegna veðurs. Síðasta sumar í hitabylgjunni var ég á prógrammi þar sem ég þurfti að nota 4 tæki í einu, fór úr einu tæki í annað og það var aldrei neitt vesen því það var ekki kjaftur að æfa.

[Palli (IP-tala skráð) 13.6.2008 kl. 13:48]

Ég var búinn að kanna málið og allavega þar sem að ég æfi er um 25% mæting í ræktina á sólríkum sumardegi miðað við skýjaðan vetrardag.

[Sesselja Fjóla Þorsteinsdóttir, 13.6.2008 kl. 14:06]

Bara frábær færsla.

[Lovísa (IP-tala skráð) 13.6.2008 kl. 21:05]

hahahah þetta er nú ein mesta snilld sem ég hef lesið lengi. Alveg heyrir maður rödd Naglans við að lesa þetta.. já eða garg í eyrað ;) sjáumst á morgun

[Ragnhildur Þórðardóttir, 13.6.2008 kl. 21:15]

Palli! Það er ótrúlegt hve margir sleppa einum klukkutíma í ræktinni til að sleikja sólina. Vonandi eru þeir að hjóla, á línuskautum, í golfi, á Esjunni....

Fjóla! Takk fyrir það.

Já Lovísa þú ættir að þekkja það, Naglinn stóð nú með svipuna á þér í Laugum hér um árið. Hlökkum mikið til að koma til þín á morgun og fagna með þér. Sjáumst skvís.