Hver pantaði þennan snjó?

Það er fátt sem fer eins mikið í taugarnar á Naglanum og snjór, Naglinn gjörsamlega ÞOLIR ekki snjókomu og vetrarfærð. 
Eins og kom fram í pistli ekki alls fyrir löngu er þessi andúð tilkomin vegna erfiðleika að komast frá A til B, og þá aðallega að heiman í ræktina. 
Þessi martröð varð að veruleika þegar Naglinn og hösbandið hugðust leggja í hann fyrir allar aldir í morgun. 
Þegar litið var út um gluggann blasti við ömurlegur veruleiki þessa lands....allt á kafi í snjó!!! Nú lágu Danir í því.  Hösbandið er nefnilega haldinn þeirri sjálfsblekkingu að hann sé sautján ára og keyrir um á Bimma sem er svo lágur að það eru vandræði að komast yfir hraðahindranir. 
Ekki nóg með það, heldur er kvikindið afturhjóladrifinn OG á Low-profile sumardekkjum.   

Ítrekaðar tilraunir voru gerðar til að komast út úr hverfinu sem er allt saman upp í móti, og alltaf spólaði gelgjubíllinn í miðri brekku. Naglinn sá stefna í sitt óvænna um hríð, að hjónin myndu hreinlega ekki komast í ræktina..... og bullandi fráhvarfseinkenni byrjuðu strax að gera vart við sig.  Fíkillinn þarf að fá skammtinn sinn.  

Að lokum komst kvikindið þó loks upp brekkuna eftir að Naglinn hafði grýtt sér út úr bílnum á ferð til að ýta síðasta spölinn undir skæðadrífu af snjó frá spólandi dekkjunum og bullandi útblæstri úr pústinu.  Í ræktina skyldi Naglinn, sama þó það kostaði lungnaþembu vegna koltvísýringsmengunar.

Naglinn vill setja lögbann á snjó!!   

Athugasemdir

[M, 22.10.2008 kl. 11:36]

Já það er eins og maður sé aldrei undirbúinn fyrir snjóinn. Alltaf jafn hissa og pirraður á ástandinu.

En þú hefur fengið extra æfingu að ýta bílnum upp brekkuna

[Ragnhildur Þórðardóttir, 22.10.2008 kl. 11:45]

Það var þessi fína upphitun að ýta, nú ef allt annað bregst þá verður næsta æfing bara að ýta bílum... tekur bæði á styrk og þol

[Marinó Óskar Gíslason, 22.10.2008 kl. 11:49]

Og svo er líka gott fyrir kroppinn að ganga í vinnuna ef bíltíkin er ekki búin fyrir snjóinn, eða þá bara að taka strætó. Hann klikkar ekki. Stundum aðeins seinn en engar áhyggjur af umferðinni

[Anna María (IP-tala skráð) 22.10.2008 kl. 11:51]

Hahaha gelgjubíllinn . Eftir að hafa gert þau hrikalegu mistök að versla Benz hér fyrir 4 bílum síðan ákvað ég að kaupa aldrei aftur afturhjóladrifinn bíl. Þvílík hörmung og niðurlæging að spóla um á þessu í snjó.

Ég aftur á móti kann vel við snjóinn, kemst í vetrarfílinginn. Enda á ágætum bíl í snjó . Svo styttist líka í skíðin með hverju snjókorni.

Kveðja

Anna María, sem fílar snjóinn. 

[Ragnhildur Þórðardóttir, 22.10.2008 kl. 12:14]

Marínó! Ef strætó á þessu bölvaða landi væri byrjaður að ganga kl. 0600 þá hefði það verið fín lausn. 

Anna María! Ég kemst í engan vetrarfíling.... verð bara pirruð.  Þoli ekki blautar buxnaskálmar heldur .

[Ingunn Þ. (IP-tala skráð) 22.10.2008 kl. 12:36]

HAHAHAHAHA...skemmtilegar lýsingar hjá þér...ég sé þetta svo innilega fyrir mér 

[Mama G, 22.10.2008 kl. 17:34]

LOL

Mér sýnist sem svo að þú sért ekki nógu útsjónarsöm búandi hérna á Íslandi. Þegar við kallinn byrjuðum að leita okkur að íbúð var það eitt af okkar skilyrðum að íbúðin væri í göngufæri frá WorldClass - now that's a sickness á háu stigi

[Ragnhildur Þórðardóttir, 22.10.2008 kl. 19:38]

Mama G! Júhú ég er sko útsjónarsöm með eindæmum þegar kemur að búsetu og ræktinni, því þegar ég flutti hingað voru bæði World Class og Hreyfing í göngufæri og ég æfði í þeim báðum (stundum samtímis) en svo tóku þessar stöðvar upp á þeim dónaskap að flytja.

[Diddi (IP-tala skráð) 23.10.2008 kl. 07:58]

Hvað er þetta???....það vantar allan krakkan í þig:).... Snjór, snjókast, snjóhús, VVVVÍÍÍÍ....

Auk þess gætir þú farið að nota gönguskíði. Það eru fáir með jafn mikið þol og skíðagöngugarpar!