Hvað einkennir þá sem ná árangri?

Í framhaldi af síðasta pistli vill Naglinn aðeins velta fyrir sér hvað einkennir þá sem ná varanlegum árangri þegar kemur að breytingum á eigin líkama.

Nokkrir bandarískir þjálfarar, sem allir hafa víðtæka reynslu af því að aðstoða fólk við að breyta líkama sínum, hafa nefnt nokkur atriði sem eru gegnumgangandi hjá þeim sem hafa viðhaldið árangri sínum.
Það eru engin leyndir hæfileikar sem búa að baki, heldur er um að ræða svipað mynstur hjá öllum.

1) Þeir verða illa pirraðir. Einn karlmaður lýsti reynslu sinni þannig: "Ég var feitur og það fór hrikalega í taugarnar á mér." Í stað þess að leggjast í sjálfsvorkunn nýtti hann þennan pirring til að knýja sig áfram í ræktinni. Naglinn kannast mjög vel við þetta, hryggðarviðbjóðurinn sem starði á móti í speglinum var það eldsneyti sem þurfti til að vakna í ræktina á hverjum morgni, og sleppa hinum og þessum kræsingum. Viljinn til breytinga varð yfirsterkari viljanum til að vera áfram eins.

2) Þeir sækja í fólk sem er með svipaðan hugsunarhátt. Ef þú vilt missa fitu þýðir ekki að hanga með kyrrsetufólki sem kjamsar á viðbjóði alla daga. Þú þarft að vera með fólki sem fyllir þig metnaði, fólki sem hefur svipuð markmið og þú, og jafnvel einvherjir sem þú lítur upp til og hafa þann líkama sem þú vilt sjálf(ur). Losaðu þig við letihaugana, í bili að minnsta kosti.

3) Þeir setja sér markmið með skýr tímamörk. Það þarf að vera lokadagsetning, t.d afmæli, páskar, reunion. Þetta er ein ástæða þess að nýársheit mygla um miðjan febrúar, það er engin pressa að ná árangri. Að komast í gott form er ekki markmið, að missa 5 kg fyrir páska er markmið. Aðgerðaáætlun þarf síðan að fylgja markmiðinu, hvernig ætlarðu að komast á leiðarenda. Til dæmis til að missa 5 kg af fitu þarf ég að borða x margar hitaeiningar, mæta í ræktina x sinnum í viku: lyfta x sinnum og brenna x sinnum.

4) Þeir halda dagbók. Það er lykilatriði að skrifa niður, til dæmis þyngdirnar í ræktinni, matardagbók og hvernig þeim líður í dag: er erfitt að halda sig við mataræðið, var æfingin erfið. Það er drepleiðinlegt að skrifa niður hverja örðu sem fer upp í túlann á manni, en það er lykilatriði í öllum árangri. Ef þú veist ekki hve mikið þú ert að borða hvernig áttu þá að geta breytt einhverju til að ná árangri?

5) Þeir halda sig við planið. Alltof margir eru haldnir athyglisbresti þegar kemur að æfingaprógrömmum og mataræði. Þeir prófa hitt og þetta í smá tíma en gefast svo upp af því árangurinn kemur ekki "med det samme" og prófa eitthvað nýtt. Öll prógrömm taka tíma til að virka, ef þú skilur það í upphafi og treystir þeim sem bjó það til þá mun árangurinn skila sér mun hraðar en hjá þeim sem efast um allt og prófa allt of mikið.

6) Þeir æfa eins og skepnur. Margir vanmeta þann tíma sem þarf til að ná árangri, þeir eru ginnkeyptir fyrir skyndilausnum sjónvarpsmarkaðarins. Þeir sem ná árangri vita að það þarf að mæta í ræktina í 45-60 mínútur 4-6x í viku til að ná árangri. Ef þú sérð einhvern með öfundsverðan skrokk máttu bóka að viðkomandi æfir eins og skepna flesta daga vikunnar. Því erfiðari sem æfingin því meiri árangur. Ekki láta neinn ljúga að þér að það sé auðvelt að breyta líkamanum, fagnaðu frekar erfiðleikunum og njóttu þess að ögra líkamanum á næsta stig.

7) Þeir skipuleggja máltíðir sínar fram í tímann. Tupperware verður besti vinur þinn. Þeir sem ná árangri eru ekki aðeins með plan, heldur framkvæma þeir það. Þeir sem éta upp úr Tupperware eru þeir sem er alvara með árangur sinn, búa til matinn sinn fram í tímann og passa skammtastærðirnar. Ef þú átt alltaf hollustu tilbúna í töskunni er ekki lengur ástæða til að borða eitthvað rugl í örvæntingarhungri í vinnunni eða skólanum.

Tekið af T-nation.

Athugasemdir

[Elísa (IP-tala skráð) 4.2.2009 kl. 23:56]

Hæ hæ.

Kíki reglulega hérna inn til að fá smá innblástur þegar ég er ekki í stuði til að æfa eða passa mataræði. Mjög fín blogg hjá þér:)

Mig langaði líka að benda á snilldarsíðu sem ég nota fyrir matardagbókarskrif en það er heimasíða Matís þar sem hægt er að fá upplýsingar um næringarinnihald og hitaeiningafjölda í um það bil ÖLLU sem selt er á Íslandi. Linkurinn er http://www.matis.is/ISGEM/is/toflurpdf/

Þetta segir sig sjálft inni á síðunni:)

Bestu kveðjur,

Elísa

[Ragnhildur Þórðardóttir, 5.2.2009 kl. 08:22]

Sæl Elísa,

Takk fyrir að kíkja í heimsókn og fyrir að kommenta. Alltaf gaman að heyra frá lesendunum.

Ég mæli einmitt oft með MATÍS vefnum, hann er algjör snilld.

[Nafna (IP-tala skráð) 5.2.2009 kl. 10:00]

Frábært eins og alltaf að lesa pistlana þína! Pirringurinn var einmitt faktor sem rak mig af stað í breyttan lífsstíl núna. Eftir ótal skipti að hætta og byrja aftur hef ég aldrei haldið úti jafnlengi og núna enda er þetta hreinlega komið inn í rútínu og mér finnst ég skrópa ef eitthvað klikkar ;) Takk kærlega fyrir "inspirationið" og fróðleikinn sem þú hefur veitt mér og öðrum.

[Ragnhildur Þórðardóttir, 6.2.2009 kl. 09:54]

Nafna! Takk fyrir hrósið ;-) Ánægð með þig að vera komin í þægilega rútínu þar sem hreyfingin er ómissandi. Það er risastór áfangi.

[Bárður (IP-tala skráð) 8.2.2009 kl. 22:37]

Sæl. Fínt blogg. Eitt sem ég hef oft spáð í er; hvað er maturinn lengi að setjast utan á mann? Og að sama skapi, hvað líður langt frá því maður fer að æfa og þar til maður fer að minnka? Svona sirca?

kv.

 Bárður

[Thelma (IP-tala skráð) 9.2.2009 kl. 00:29]

heheh, kannast við að hafa lesið mjög svipaða grein á t-nation. þú vinnur greinilega heimavinnuna þína

[Ragnhildur Þórðardóttir, 9.2.2009 kl. 08:19]

Já ég nota ýmsar uppsprettur fyrir efni í greinar. T-nation er ein þeirra.