Skyggnst á bak við tjöldin

Í framhaldi af síðasta pistli um einkennilega hegðun í ræktinni fer Naglinn nú bakvið tjöldin, nefnilega inn í búningsklefana. Ástæðan fyrir bloggleysi undanfarinna daga er dvöl Naglans í ríki Elísabetar Bretadrottningar og það var nokkuð athyglisvert að bera hegðun þegna hennar hátignar saman við þegna Margrétar Þórhildar Danadrottningar.

Þar sem Naglinn er eingöngu í kvennaklefunum er hún eingöngu frásögu fær um hegðun kvenna. Danskar kvinnur eru svipaðar okkur Frónbúum þegar kemur að nekt. Þær snara sér hiklaust úr spjörunum fyrir framan kóng og prest, og valsa um á skonsunni inn og út úr sturtuklefanum sem allir eru galopnir með sturtum hlið við hlið eins og þekkist heima. Þurrkun og íklæðning eru heldur ekki feimnismál og sprangað um á brókinni meðan verið er að greiða hár og snurfusa sig.

En annað er uppi á teningnum hjá Tjallanum. Það er eins og að koma í búningsklefa á Viktoríutímanum, slík er blygðunarkenndin.
Í fyrsta lagi eru sturtuklefarnir allir lokaðir, svo hver og ein er með sinn eigin klefa sem lokast.
Í öðru lagi má ekki sjást í neitt hold á meðan farið er í og úr spjörunum.
Naglinn upplifði magnað atriði hvað þetta varðar í síðustu dvöl sinni. Kona ein fór í svartan ruslapoka sem var klipptur í sundur á lokaða endanum á meðan hún klæddi sig úr fötunum. Svo virtist sem hún væri ekki með handklæði meðferðis til að hylja nektina, spurning hvort hún "air-dry" eins og Cuba Gooding Jr. í Jerry Maguire.
Önnur vinkona fór inn í sturtuklefann í öllum fötunum og kom svo fram í öðrum fötum og öll hrein og fín.
Semsagt hún hefur baðað sig OG skipt um föt inni í sturtuklefanum. Róleg í spéhræðsluna vinkona.
Naglinn tekur ekki þátt í svona feluleikjum og fann virkilega fyrir óþægilegum augnráðum breskra kynsystra sinna.

Fjölbreytileiki mannlífsins er líka heillandi viðfangsefni.
Á Íslandi eru 99.9 % lútherskir Aríar svo okkur gefst sjaldan tækifæri til að skyggnast inn í aðra menningarheima.
Til dæmis eru múslimakonur í DK með slæðurnar í ræktinni, alveg sama þó það sé löðursveittur spinningtími. Naglinn getur ekki einu sinni verið með derhúfu né hárband í ræktinni sökum hita og óþæginda.
Þær fara meira að segja í sturtu með slæðurnar. Svolítið kómískt að sjá nakta konu með slæðu í sturtu.

Eins og sjá má hefur Naglinn mjög gaman að því að spá í náunganum í ræktinni.

Athugasemdir

[Óli Jóns (IP-tala skráð) 22.4.2009 kl. 08:17]

Það er svipað uppá teningnum hjá Frökkum og Bretunum, eða allavega á sundstöðum, ég lenti í því að vera sagt eftir eina sundferð þar á bæ að maður ætti að skipta um föt og fara í skýluna áður en maður færi inní sturtuklefann og ekki fara úr henni aftur fyrren maður væri kominn aftur í skiptiklefann. Og var þetta vegna þess að það voru MYNDAVÉLAR í sturtunum! Fékk með þeim óhugnalegri augnarráðum æfi minnar þegar að ég gekk framhjá afgreiðsluni út af staðnum og sá gömlu konuna sem sat og vaktaði öryggismyndavélarnar...

[Hrund (IP-tala skráð) 22.4.2009 kl. 09:25]

hahaha.... ótrúlega fyndið hvað fólk getur verið spéhrætt, að nenna að klæða sig í sturtuklefanum, þvílíka vesenið!! Ég man líka eftir svona klefasturtum í New York með tjöldum og alles fyrir. Það var mjög svona öðruvísi.

[Ragnhildur Þórðardóttir, 22.4.2009 kl. 10:27]

Óli ! Kallinn minn lenti oft í þessu sama í sundlaugunum í Edinborg þegar við bjuggum þar. Þar var honum skipað aftur í brækurnar af verðinum í sturtunum. Þeir sem vildu baða sig á félaganum þurftu að fara í sérstaka sturtuklefa með sturtuhengi.

Hrund! Það voru einmitt svona sturtuklefar í ræktinni sem ég fór í í NYC. Kaninn er álíka spéhræddur og þeir hinum megin við Atlantshafið.

[Íris Edda Heimisdóttir (IP-tala skráð) 22.4.2009 kl. 13:57]

Ég æfði sund lengi lengi og ferðaðist víða í tengslum við það svo ég þekki þetta aðeins, það er alveg magnað að fylgjast með fólki frá sumum þjóðum hvað spéhræðslu varðar, alveg eins og þú ert að lýsa hér í þessum pistli þínum! Svona erum við nú ólík eins og við erum mörg í þessum heimi :) skemmtileg lesning...

[Nanna (IP-tala skráð) 23.4.2009 kl. 22:51]

Snilldin ein eins og venjulega, vonandi áttu eftir að hitta mikiðmikið meira af furðulingum svo við fáum fleiri skemmtilegar sögur ;)