Prótín + Kolvetni = sönn ást

Það var mjög áhugaverður þáttur frá BBC á RÚV á mánudagskvöldið sem heitir "Matur er mannsins megin". 

Þar var gerð smá tilraun á því hvaða næringarefni halda manni söddum lengst. 

Þrír menn voru látnir fasta í nokkra klukkutíma og var svo gefið að borða, einn fékk pasta með kjúklingi (prótín), annar fékk eingöngu pasta (kolvetni) og sá þriðji fékk pasta með rjómasósu (fita).  Þeir voru svo spurðir reglulega hvort þeir væru orðnir svangir aftur og hvort þeir gætu hugsað sér að borða eitthvað fljótlega. 

Sá sem fékk prótín máltíð var saddur mun lengur en hinir tveir.  Hann borðaði líka minna en hinir tveir í næstu máltíð. 

Sá sem fékk fituríku máltíðina borðaði hins vegar mest í næstu máltíð.

Naglinn predikar mjög oft um mikilvægi þess að borða skammt af prótíni á móti skammti af kolvetnum í hverri máltíð og þessar óvísindalegu niðurstöður gefa þessu nöldri mínu aldeilis byr undir báða vængi. 

Við eigum að reyna að borða allavega 2 g af prótíni per kg af líkamsþyngd og dreifa því yfir 5-6 máltíðir dagsins.   Prótín hefur stjórn á insúlín flæði sem er losað út í blóðrás í kjölfar neyslu kolvetna.  Þannig er komið í veg fyrir það blóðsykursfall sem gerist þegar máltíðin samanstendur eingöngu af kolvetnum.  Þess vegna borðum við minna í næstu máltíð þar sem orkuflæðið er stöðugt yfir daginn. 

Athugasemdir

[Ester Júlía, 17.10.2007 kl. 09:08]

Mjög áhugaverður þáttur.  Engin ný sannindi með próteinið svo sem en gaman að sjá tilraunina :).   Eins þótti mér mjög áhugavert þetta með að ef borðaðar eru kalkríkar mjólkurvörur þá skilst fitan meira eða hraðar  út með hægðunum.  Skyrið er prótein og kalkríkt svo nú borðar maður það með enn betri samvisku.  Langar að hrósa þér fyrir þessa síðu, æðislega flott síða hjá þér, kíki oft á hana . KKVEÐJA Ester

[Svandís Rós, 17.10.2007 kl. 09:41]

Kíki hérna inn reglulega og sýg í mig fróðleikinn frá þér... keep up the good work!

[Ragnhildur Þórðardóttir, 17.10.2007 kl. 09:43]

Sæl Ester, þakka þér kærlega fyrir hrósið.  Og takk fyrir að kíkja í heimsókn, alltaf gaman ef einhver nennir að lesa blaðrið í mér .

Já það var margt athyglisvert sem kom fram í þessum þætti , til dæmis þetta með mjólkurvörurnar.  Mér fannst líka mjög athyglisvert sem kom fram í sama þætti fyrir nokkrum vikum þar sem þeir gerðu þeir tilraun með börn þar sem í ljós kom að þau skammta sér minna á diskinn ef þau skammta sér sjálf en þegar foreldrarnir gera það fyrir þau.  Þetta gæti skýrt eitthvað smotterí í sambandi við offituvanda barna í heiminum í dag . 

[Ragnhildur Þórðardóttir, 17.10.2007 kl. 09:44]

Takk fyrir það Svandís, og takk fyrir að kíkja í heimsókn .

[Ragnhildur Þórðardóttir, 18.10.2007 kl. 15:59]

Sæll Helgi, og takk fyrir að kíkja í heimsókn.  Ekki misskilja mig, það var akkúrat minn punktur að tilraunin sem BBC gerðu var ekki vísindaleg, en ég var ekkert að fetta fingur út í aðrar tilraunir sem styðja þessa tilgátu né aðrar sem komu fram í þættinum.