Sigg og vöðvar

Naglinn vann með manni í Edinborg sem var að selja þekkt fæðubótarefni í hjáverkum. Maðurinn hélt ófáar lofræðurnar um duftið og stangirnar við okkur samstarfsfólk sitt og reyndi sitt ítrasta að fá okkur til að opna budduna. Eitt sinn lenti Naglinn í rökræðum við félagann þegar hann hélt því blákalt fram án þess að blikna að með því einu að drekka sjeikana og teið, og kjamsa á prótínstykkjunum þá myndu vöðvarnir stækka því maður væri að borða meira prótín en áður. Naglinn benti honum á að vöðvar stækka ekki með því einu að borða prótín heldur þarf lóðaþjálfun að koma til. Mataræði eitt og sér getur ekki stækkað vöðva, þeir þurfa vísbendingu til að stækka, og sú vísbending kemur með því að tæta niður vöðvana á æfingu. Vöðvar eru eins og sigg. Lyftingamenn og margir iðnaðarmenn eru með sigg í lófunum sem myndast þegar lófanum er stöðugt nuddað upp við hart yfirborð. Líkaminn fær vísbendingu um að mynda þykkari húð þar sem áreitið er sem mest til að verjast hörðu yfirborði. Sami mekanismi fer í gang þegar við lyftum lóðum. Áður en að vöðvi getur stækkað þarf hann að fá vísbendingu. Ef við áreitum vöðva með lóðaþjálfun, þá erum við að rífa þá niður og þeir neyðast til að stækka og styrkjast til að geta brugðist við þessu áreiti aftur. Þegar vísbendingin um að stækka vöðvana kemur, þurfum við hins vegar að hafa nóg af byggingarefni í líkamanum til að stækka þá fyrir næsta skipti sem hann mætir áreitinu. Byggingarefnið kemur úr prótíninu, en kolvetni og fita eru líka nauðsynleg til að ná sem bestum árangri. Það er því mikill misskilningur að halda að prótínríkt mataræði eitt og sér byggi upp vöðva. Alveg eins og siggið úr lófunum hverfur þegar við hættum að lyfta, þá hverfa vöðvarnir líka, alveg sama hvað við úðum í okkur miklu af prótíndufti. Pumpum lóðin gott fólk og borðum fjölbreytta fæðu sem innihalda öll næringarefni !!

Athugasemdir

[gua (IP-tala skráð) 3.2.2008 kl. 19:56]

sæl, takk fyrir pistlanna þína sem eru fróðlegir, mig langar að spyrja þig. ég fæ mér alltaf próteinskhake þegar ég kem heim úr ræktini ég blæs umsvifalaust upp (fæ mikið loft í garnirnar) síðan mikið prump mér finnst þetta mjög óþægilegt, er einkvað sem þú mælir með (prótein) fram yfir annað. kv.gua

[sas (IP-tala skráð) 4.2.2008 kl. 07:07]

Þessi félagi valdi ekki réttu manneskjuna til að halda þessu framm við. En þetta er eitthvað svo mikið nútíma samfélag ég meina taka eitthvað inn og sjá árangur. En eins og þú sagðir svo réttilega hérna fyrir nokkru að eini staðurinn þar sem að árangur er á undan vinnu er í orðabók.

Alltaf gaman að koma hingað og lesa hnitmiðaða pistla. Kem daglega hingað

[Ragnhildur Þórðardóttir, 4.2.2008 kl. 09:06]

Gua! Því miður er prump óhjákvæmilegur fylgifiskur prótínneyslu, held að það upplifi það allir eftir neyslu prótínsjeika.  Allavega er ég stundum ekki húsum hæf .  Ég nota Scitec og Myoplex prótín, finnst minni vindgangur koma af Scitec en af Myoplexinu og held að það sé vegna þess að enginn laktósi er í Scitec.  Er dálítið næm fyrir mjólkursykri.  Þú þarft bara að prófa þig áfram í prótínhafinu sem er í boði og finna hvað hentar þér. 

SAS!  Einmitt, fólk elskar að heyra svona bábiljur um töfralausnir, því það nennir ekki í ræktina.  Takk fyrir hrósið og gaman að þú skulir koma í heimsókn . 

[Hrund (IP-tala skráð) 4.2.2008 kl. 12:53]

Hæhæ, var að lesa mér til um "carb cycle"  - finnst það dáldið sniðugt.. hvað finnst þér?

[Ragnhildur Þórðardóttir, 4.2.2008 kl. 13:18]

Ég geri "carb-cycling" sjálf og mæli eindregið með því.  Borða meira af kolvetnum á lyftingadögum, og low carb á cardio- og hvíldardögum.  Borða mest af kolvetnum í kringum æfingarnar og á morgnana.