Tjallinn tekur á því

Naglinn ól manninn í heimsborginni Lundunúm um liðna helgi.  Ræktin var auðvitað stunduð samkvæmt áætlun, enda fer líkaminn ekkert í frí þó hann sé staddur í öðru landi . 

Naglinn hefur alltaf jafn gaman að því að fylgjast með Tjallanum hrista skankana, því oft má sjá athyglisverðar útgáfur af heilsurækt.  Þeir eru margir aðeins aftar á blessaðri merinni þegar kemur að líkamsrækt. 

Reyndar skal tekið fram að þessi tiltekna stöð sem Naglinn svindlar sér inn í á korti systur sinnar  er ríkisrekið batterí, en ekki einkavætt fínerí.  Kúnnahópurinn er því afar fjölbreyttur, og getur verið ansi skrautlegur á köflum.  Til dæmis sú gamla á þrekhjólinu með vasadiskó með kasettuspilara. Svo var það félaginn (nota bene karlmaður) með svitaband um ennið og legghlífar.  Velti fyrir mér hvort ég hefði lent í tímavél aftur til ársins 1985. 

Ekki má svo gleyma tilburðunum í lyftingasalnum.  Þar mátti sjá nýstárlega fótaæfingu sem fólst í stöng á öxlum, og svo marsérað á staðnum eins og lífvörður hennar hátignar.  Naglinn var ekki viss um þessa æfingu, svo hann fékk tækifæri til að hringja í vin, spyrja salinn eða 50/50. 

Svo sá maður auðvitað þetta klassíska eins og hliðarlyftur fyrir axlir þar sem lóðunum er bókstaflega hent hátt upp í loft með svo miklu offorsi að maður á fótum fjör að launa sé maður nálægt. 
Og auðvitað félagann í róðri með lóð, sem líkist meira tilraun til að koma sláttuvél í gang. 
Ef maður hlustar vel, má heyra liðamót ískra.

Athugasemdir

[M, 25.2.2008 kl. 09:39]

sé þau tvö þarna í anda með kasettutækið og legghlífarnar. Ætli það yrði ekki svipað og ef ég tæki fram skíðagræjurnar mínar eftir öll þessi ár og tæknin eftir því.

[Hjörtur Hjartarson (IP-tala skráð) 25.2.2008 kl. 10:25]

Kasettutæki og leglífar eru töff!

[Ragnhildur Þórðardóttir, 25.2.2008 kl. 11:44]

Já ég skemmti mér konunglega við að mæla út mannskapinn á milli setta .

[Ragnhildur Þórðardóttir, 26.2.2008 kl. 11:47]

Hahahaha  Brilljant saga!  Ekki skrýtið að lappirnar hafi verið eins og spagettí við að taka 100 reps og bara isolation æfingu .   Það getur alveg verið hin mesta skemmtun að fylgjast með sumu fólki æfa.