Bestu vextirnir

Ávextir eru meinhollir, pakkaðir af næringarefnum, með mikið af trefjum, vítamínum, steinefnum, og lítið af fitu og hitaeiningum. 

Ávextir innihalda eins og áður segir helling af trefjum sem eru nauðsynlegar fyrir eðlilega meltingarstarfsemi.  Trefjar eru ekki meltar af líkamanum og innihalda ekki hitaeiningar, en veit samt sem áður mikla seddutilfinningu.

Hefurðu einhvern tíma prófað að borða 5 epli í röð?  Líklega hefurðu gefist upp á miðri leið því trefjarnar eru svo mettandi en 5 epli eru aðeins 300 hitaeiningar.  Það er hins vegar lítið mál að gúffa í sig 5 smákökum en þá erum við búin að innbyrða um 1000 hitaeiningar.

Ávextir innihalda sykur, en það er engin ástæða til að verða hræddur, því það er ekki gamli strausykurinn.  Ávaxtasykur er náttúrulegur sykur, en er engu að síður einfaldur sykur og því er best að tímasetja inntöku ávaxta í kringum þann tíma sem við erum mest virk, til dæmis á morgnana og í kringum æfingar.  Eftir því sem líður á daginn er betra að skipta yfir í hæglosandi kolvetni.

 

Ef við erum að reyna að grenna okkur er ráðlegt að borða ekki meira en 1-2 ávexti á dag. 

 

En allir ávextir eru ekki skapaðir eins. 

• Epli, perur og appelsínur eru bestu kostirnir enda mjög trefjarík og með lágan sykurstuðul.  Þess vegna eru þau yfirleitt flokkuð sem hæglosandi kolvetni.
• Mangó, ferskjur, plómur, kíví, jarðarber, bláber hafa aðeins hærri sykurstuðul en eru samt ágætir kostir.  Betra er að neyta þessara ávaxta fyrr um daginn þegar við erum með tómar kolvetnabirgðir og þurfum að fylla fljótt á, til dæmis í morgunmat eða í morgunkaffi.
• Bananar eru orkuríkari en aðrir ávextir, því þeir innihalda smávegis fitu.  Þeir skila sér hratt út í blóðrás og eru því góður kostur fyrir æfingar. ½ banani telst sem einn ávaxtaskammtur.
• Avókadó er mjög fituríkt, og best að neyta þess í hófi.
• Melónur, ananas og papaya hafa mjög háan sykurstuðul.

Athugasemdir

[Hjörtur Hjartarson (IP-tala skráð) 5.6.2008 kl. 16:20]

Nú langar mig í epli..

[Elsa (IP-tala skráð) 5.6.2008 kl. 16:31]

takk fyrir þetta :)

Týpískt að melónur og ananas séu með svona háan sykurstuðull

Allt tal um 5 ávexti á dag er sensagt tóm þvæla ?

[Ragnhildur Þórðardóttir, 5.6.2008 kl. 17:42]

Einmitt týpískt að bestu ávextirnir eru þessir sætustu... sem eru líka "óhollastir"

5 á dag er ekki algjört kjaftæði því það er talað um 5 skammta af ávöxtum OG grænmeti, en það er hægt að borða nánast óendanlegt magn af grænmeti. Þannig að 1-2 ávextir á dag og 3-4 skammtar af grænmeti, og þú ert í gúddí fíling.