Krakkamáltíðir.... auðveld en hættuleg lausn á kvöldmatnum

Nýlega birtist skýrsla frá lýðheilsusamtökunum Center for Science in the Public Interest (CSPI) í Bandaríkjunum um næringargildi krakkamáltíða hjá 13  skyndibitakeðjum eins og KFC, Taco Bell, Mc Donalds og Burger King.  Í ljós kom að í 93% tilfella voru skammtarnir stærri en 430 hitaeiningar, sem er 1/3 af ráðlagðri daglegri hitaeiningaþörf 4 til 8 ára barna.

Til dæmis á einum staðnum Chili's Bar and Grill sem ekki er á Íslandi... ennþá allavega, er hægt að fá krakkamáltíð sem samanstendur af ostapizzu, frönskum kartöflum og límonaði og inniheldur slík veisla hvorki meira né minna en 1000 hitaeiningar.  Það jafngildir u.þ.b 2/3 af hitaeiningaþörf barnsins.  Burger King sem hefur fest rætur hérlendis býður upp á máltíð fyrir börn sem inniheldur tvöfaldan ostborgara, franskar og súkkulaðimjólk og 910 hitaeiningakvikindi synda í því boxi.

Subway er víst með skársta úrvalið þegar kemur að krakkamáltíðum hvað varðar hitaeiningar en aðeins 6 af 18 valkostum fóru yfir 430 hitaeininga markið.  Það sem aðgreinir Subway frá hinum stöðunum er að þeir bjóða ekki upp á gosdrykki með krakkamáltíðum og það lækkar hitaeiningafjöldann. 

Það þarf að fara í gegnum frumskóg af fitu, salti og hitaeiningum til að finna holla valkosti fyrir börnin. 

Niðurstöðurnar bentu einnig á að í 45 % af þeim krakkamáltíðum sem skoðaðar voru, var magn mettaðrar fitu og transfitu umfram ráðleggingar.  Það getur hækkað kólesteról hjá börnum og aukið líkur á hjartasjúkdómum hjá börnunum.  Önnur sláandi niðurstaða var að 86% máltíðanna voru með of hátt salt magn.

 

Það er tekið fram í skýrslunni nú til dags eru börn að fá þriðjung hitaeininga sinna í veitingahúsaferð, sem er tvöfalt meira en fyrir 30 árum síðan.

Höfundar skýrslunnar mæltu með við veitingastaði eftirfarandi:

 

• Endurskoða matseðilinn til að minnka hitaeiningar, mettaða fitu, transfitu og salt.  Einnig að bjóða upp á fleiri hollar afurðir eins og ávexti, grænmeti og heilt korn.

 

• Gera ávexti eða grænmeti og fitusnauða mjólk að stöðluðu meðlæti í stað franskra kartaflna og gosdrykkja.

 

• Veita upplýsingar um næringargildi á matseðlum.  New York og San Francisco eru meðal þeirra borga sem hafa tekið upp reglugerðir um slíkar upplýsingar á matseðlum.

 

Það má samt ekki gleyma því að þekking og vitund um hollustu og gott mataræði fer fram innan veggja heimilisins, og það er því alltaf á ábyrgð foreldranna að innræta börnum sínum hollari lífshætti.

 

 

 

Eftir CSPI,
Blaðamaður: JOAN LOWY, Associated Press
4. ágúst

 

Athugasemdir

[Hrund (IP-tala skráð) 14.8.2008 kl. 12:17]

Það er einmitt alveg óþolandi að geta ekki fengið neitt annað fyrir barnið sitt nema kjúklinganagga, franskar, hamborgara og þ.h. þegar maður fer e-ð út að borða.

[Ragnhildur Þórðardóttir, 14.8.2008 kl. 13:20]

Einmitt.  Ég hef nefnilega tekið eftir að barnamatseðill, jafnvel á fínum veitingastöðum, er alltaf pizza og hamborgarar og franskar.  Af hverju ekki að bjóða upp á hollan pastarétt eða djúsí kjúklingarétt??  Það er alltaf gert ráð fyrir að börn vilji bara drasl að borða!!

[Hrund (IP-tala skráð) 14.8.2008 kl. 17:16]

Jú ég á krakka

[Sesselja Fjóla Þorsteinsdóttir, 14.8.2008 kl. 19:22]

Góð færsla þetta sem á erindi í td Fréttablaðið.

[Ragnhildur Þóra , 15.8.2008 kl. 08:33]

Frábært að lesa síðuna þína.

Góð hvatning:)

[Mína (IP-tala skráð) 15.8.2008 kl. 08:51]

Verð að taka undir þetta. Það er alveg ótrúlegt rusl sem börnum er boðið uppá á veitingastöðum. Þegar ég bjó í USA (Atlanta, GA) fannst mér þetta sérstaklega áberandi. Djúpsteiktur kjúklingur og franskar eða fitulöðrandi ostapizzur var það sem börnum var boðið uppá. Mér fannst strax mikill munur við það að koma á austurströndina. Þar var alltaf hægt að fá e-rja hollari valmöguleika fyrir börn.

Varðandi athugasemdina hér að ofan frá Helga Briem, þá er það vissulega þannig að flestum börnum finnast gott að borða t.a.m. kjúklinganagga og franskar. A.m.k. gerir dóttir mín það með bestu list. En það er heldur ekkert mál að fá hana (og önnur börn) til að borða hollari mat. Þetta er allt spurning um hvernig maturinn er framborinn og samsettur. Mín reynsla er sú að börn eru ekki hrifin af mat sem er búið að blanda mikið saman t.a.m. í e-rju sósujukki heldur er einfaldleikinn bestur.

Ég verð að segja að ég er yfirhöfuð ekki ánægð með íslenska veitingastaði því hérna eru einmitt kjúklinganaggar og franskar einna helst í boði fyrir börn.

[Mama G, 15.8.2008 kl. 08:53]

Ég er nú bara löngu búin að gefst upp á barnamatseðlinum, panta bara ríflega fyrir sjálfa mig og bið svo um aukadisk.

Best er samt að borða bara heima

[Ragnhildur Þórðardóttir, 15.8.2008 kl. 09:30]

Takk kærlega fyrir þitt innlegg Mína.
Nú vitið þið auðvitað betur sem eigið börn hvað þau velja sér af matseðli.  Það gefur auga leið að kjúklinganaggar, hamborgarar og franskar eru voða spennandi í augum barnsins, en það eru fyrst og fremst foreldrarnir og uppeldið sem móta val barnsins, og foreldrar ættu og geta alltaf haft áhrif á hvað þau borða á slíkum stöðum.  Það er mikill ábyrgðarhluti að hugsa um mataræði barnanna sinna.  En ábyrgðin liggur ekki síður hjá veitingastöðunum, og ættu þeir að sjá sóma sinn í að bjóða upp á hollari valkosti fyrir börn en franskar og nagga. 

Gott hjá þér Mama G, að gefa þínu barni af þínum skammti enda eru "fullorðins" skammtarnir jafnan langtum hollari en barnaseðillinn. 

Fjóla! Já það er rétt, það ætti að benda fjölmiðlum á þessa skýrslu, er gott innlegg í umræðuna um transfitusýrur og offitu barna.

 Ragnhildur Þóra!  Takk fyrir það nafna.

[Hrund (IP-tala skráð) 15.8.2008 kl. 12:17]

Mér finnst bara að veitingastaðir og sérstaklega leikskólar þurfi að fara að taka sig á í þessum efnum. Maturinn sem er í boði á sumum leikskólum er oft á tíðum ekki upp á marga fiska...einstaka sinnum grænmeti með matnum, mikið um unnar matvörur eins og súpur og slíkt. Þetta er reyndar mjög misjafnt á milli leikskóla en ég hef unnið á leikskóla þar sem ég gat sjálf ekki hugsað mér að borða matinn