Dásemdir hörfræja

Dyggir lesendur þessarar síðu kannast líklega við rausið í Naglanum um góðu Omega fituna í fiski sem hjálpar til við að brenna líkamsfitunni. En þeir finnast víst sem hafa óbjóð á fiski en það þýðir bara meira fyrir okkur hin sem kunnum að meta gull hafsins, og lífið úr brjóstinu á þjóðinni. 

 

Fyrir þá sem fúlsa við fiski og fyrir þá sem vilja tryggja að mataræðið sé skothelt eru hörfræ dásamleg viðbót í Omega-3 flóruna.

Hörfræ eru:

Sneisafull af Omega-3 fitusýrum,

Pökkuð af vítamínum og steinefnum: t.d zink, járni, E-vítamíni, magnesium, kalki o.fl o.fl

Full af trefjum bæði uppleysanlegum og óuppleysanlegum.

 

Trefjar eru mjög mikilvægur þáttur í mataræði hvers og eins.  Trefjar fara ómeltar alveg niður í ristil þar sem þær hamast eins og skúringarkonur og halda honum þannig í toppstandi.  Eftir hreingerninguna eru þær síðan brotnar niður.

 

Skortur af trefjum í mataræði getur valdið:

krónísku harðlífi (getur ekki verið gaman)  

vandamálum með þyngdarstjórnun (nóg er af öðrum vandamálum í lífinu)

Háþrýstingi

Hjartasjúkdómum

Sykursýki

 

Omega - 3  fitusýrurnar í hörfræjum kallast ALA (alpha linoleic acid).

ALA eru afar gagnlegar fyrir vöðvauppbyggingu þar sem þær auka insulin næmi inni í vöðvafrumum. 

En það er ekki eina dásemdin við ALA því áhrif hennar á líkamann er margþætt.

 

Áhrifin felast m.  a.  í að:

 

Bæta ónæmiskerfið

Byggja heilbrigða frumuveggi

Stjórna sléttum vöðvum og ósjálfráðum viðbrögðum

Flytja blóð til fruma líkamans

Stjórna taugaboðum

Meginorka hjartavöðvans

 

Þannig getur neysla á hörfræjum komið í veg fyrir ýmsa kvilla og sjúkdóma á borð við krabbamein og hjarta - og æðasjúkdóma.

 

Fyrir fólk í þjálfun hefur neysla á hörfræjum eftirfarandi áhrif:

 

Minni líkamsfita

Aukin frammistaða á æfingum

Minni harðsperrur

Aukin nýtni á súrefni

Aukin nýtni á næringarefnum

Góð uppspretta orku

 

Hvernig notum við hörfræ?

Það þarf að mylja hörfræ áður en þeirra er neytt.  Hægt er að kaupa fyrirfram mulin en mun ódýrara er að kaupa poka af helium fræjum og mylja í blandara.  Síðan er mulningurinn geymdur í ísskáp.  Hann má svo nota út á hafragrautinn, í eggjahvítur, salatið, prótínsjeika. 

Naglinn mælir sérstaklega með eggjahvítupönnsum með muldum hörfræjum....algjört sælgæti

Eins er hægt að kaupa hörfræolíu og bæta út í prótíndrykki eða drekka beint af kúnni fyrir þá allra hörðustu.  Olíuna skal einnig geyma í kæli.

 

Hvort sem notað er, mulin hörfræ eða hörfræolía, skal miða við 1-2 matskeiðar á dag.

 

 

 

Athugasemdir

[alva (IP-tala skráð) 9.11.2007 kl. 21:54]

Gaman að lesa hjá þér, ég er aaaallllllveg að fara í ræktina, ekki vantar áhugann en stendur eitthvað á framkvæmdagleðinni...

[Valdís (IP-tala skráð) 10.11.2007 kl. 23:03]

Fróðlegt! - viltu þá meina að heil hörfræ geri lítið sem ekkert gagn ?

Ég hef nefnilega borðað HEIL hörfræ í töluverðan tíma - ég þarf kannski að endurskoða það og fara að hakka þau.

[alva (IP-tala skráð) 11.11.2007 kl. 02:09]

Djö...meðferðin á trefjunum annars, hamast og hamast við að skúra út og hvaðeina og síðan eru þær bara brotnar niður...beint með þær á kvennaathverfið..

[alva (IP-tala skráð) 11.11.2007 kl. 02:12]

já og eitt enn með hörfræin, að leggja þau í bleyti, virkar það ekki eins og að mylja þau, þá í bleyti í svona 12-24 tíma í kæli?? Það er allavega gert á elliheimilunum...sko við hörfræin.

[Ragnhildur Þórðardóttir, 11.11.2007 kl. 14:10]

Valdís! Mér var ráðlagt að borða þau mulin þar sem þau meltast auðveldar þannig. Sel það ekki dýrara en ég keypti það samt.

Alva! Ekki spurning að fara að drífa sig í ræktina, það er svoooo gott að æfa. Veit ekki með hörfræ í bleyti, hef heyrt um það með þurrar baunir eins og kjúklingabaunir en kann ekki á það með hörfræin. Ég borða þau alltaf mulin en ég býst við að það séu til ýmsar aðrar aðferðir við að matreiða þau.

[Mína (IP-tala skráð) 11.11.2007 kl. 15:37]

Sel það ekki dýrara en ég keypti það en ég ferð minni um Heilsuhúsið um helgina var mér tjáð að neysla hörfræja drægi einnig úr sykurlöngun. Ágætis hliðarverkun ef það er rétt

[Óla Maja (IP-tala skráð) 11.11.2007 kl. 22:17]

Ég hef notað mulin hörfræ út á hafragrautinn góða í marga mánuði en ég hafði ekki hugmynd um að þetta væri svona brilliant (eins og Vala Matt myndi segja)!

[Ragnhildur Þórðardóttir, 12.11.2007 kl. 08:40]

Mér finnst þau líka svo bragðgóð og gera mann saddari ef þeim er bætt út í matinn eins og grautinn góða eða eggjahvíturnar.

Ekki slæmt þessar upplýsingar um sykurlöngunina .

[alva (IP-tala skráð) 12.11.2007 kl. 13:54]

takk fyrir þetta, hreyfingin er í vinnslu