Einfalt mál

Eftir lyftingaæfingu fá flestir sér hreint prótín, enda þurfa niðurtættir vöðvarnir á amínósýrum að halda á þessum tímapunkti. Það vita hins vegar ekki margir að kolvetni eru gríðarlega mikilvæg eftir æfingu og margir eiga erftt með að melta þá staðreynd að eftir æfingu séu einföld kolvetni besti kosturinn.

Við sem pössum sykurstuðulinn daginn út og inn allan ársins hring, eigum oft erfitt með að sökkva allt í einu tönnunum í franskbrauð án þess að fá samviskubit á stærð við Síberíu.
En það er óþarfi því að eftir æfingu geturðu fengið þér hvítu beygluna sem þig langaði í í morgun, eða hvít hrísgrjón eftir að hafa tuggið hýðisgrjón allan daginn og það með tandurhreinni samvisku. Morgunkorn úr pakka er leyfilegt á þessum tímapunkti, meira að segja “krakka” morgunkornið.

Ástæða þess að við megum leyfa okkur svona gúmmulaði eftir að hafa lyft eins og skepna er sú að eftir æfingu er eini tíminn sem of mikil insulin losun er í lagi, og ekki bara í lagi, heldur afar nýtileg. Einföld kolvetni skila sér hratt út í blóðrás, insúlínið fer upp í hæstu hæðir sem hjálpar til við að þrýsta prótíni á ógnarhraða inn í hungraða vöðva sem eru eins og svampar á þessum tímapunkti og soga í sig prótínið. Þannig erum við að stuðla að því að viðgerð á vöðvunum hefjist hratt og örugglega.

Það þarf samt að passa að fituinnihald kolvetnanna sé í lægri kantinum, þar sem fita hægir á allri meltingu og dregur þannig úr losunarhraða kolvetna út í blóðrás og prótínið skilar sér hægar til vöðvanna.

Athugasemdir

[Audrey, 30.7.2008 kl. 10:52]

Þú ert sjálfsagt að tala um eftir lyftingaæfingu....  En hvað með eftir brennslu?

[Ragnhildur Þórðardóttir, 30.7.2008 kl. 11:09]

Já, það var ekki skýrt í textanum svo ég lagaði það. Eftir brennslu fæ ég mér alltaf morgunmat: hafragraut + eggjahvítur. Eftir brennslu má fá sér hæglosandi kolvetni og prótín því næringin þarf ekki að skila sér eins hratt út í líkamann. Eins má fá sér bara prótín, allt eftir tíma dags og markmiðum.

Ertu byrjuð að skera?

[Audrey, 30.7.2008 kl. 17:33]

Takk fyrir svarið ;)

Njaa það er búið að setja á mig strangt aðhald.... þetta fer að skella á fljótlega á fullu ;)

[Linda (IP-tala skráð) 31.7.2008 kl. 02:30]

Hæ Ragga

Frábær síða hjá þér, skemmtileg og full af fróðleik. Það væri nú agalega gaman að sjá eitthvað matarprógram hjá þér, t.d. hvað þú setur ofan í þig yfir eina viku  

[Ragnhildur Þórðardóttir, 31.7.2008 kl. 08:46]

Sæl Linda,  þakka þér fyrir hrósið.  Ég hef verið beðin um þetta áður en hef ekki viljað gera það af ýmsum ástæðum. Nú er ég hins vegar komin með þjálfara sem býr til matarprógramm fyrir mig og er ég bundin trúnaði við hann og má ekki gefa upp matseðilinn.  Ég get hins vegar sagt gróflega hvaða fæðu ég set ofan í mig og hvenær.  Myndi það hjálpa?

[Ragnhildur Þórðardóttir, 31.7.2008 kl. 10:53]

Jahá, þú segir nokkuð.  Það er aldeilis ódýr lausn. 
Því miður getum við ekki öll höndlað mjólkurvörurnar, þá þyrfti ekki að tæma pyngjuna í allt þetta prótínduft .

[Bjarney Bjarnadóttir, 31.7.2008 kl. 17:17]

Já fólki finnst oft erfitt að kyngja þessari staðreynd. Ég segi einmitt við nammigrísina, að ef þeir geti ekki verið á nammis þá er skást að fá sér nammi beint eftir lyftingaræfingu, nema nottla ekki súkkulaði, einmitt útaf fitunni eins og þú bendir á. Og þetta hjálpar mér allavega helling að halda mér á beinu brautinni, "svindla" aðeins eftir lyftingarnar, og þ.a.l er auðveldara að vera strangari í hinum máltíðum dagsins

Ég dáist að því hvað þú nennir að skrifa um þetta, ég er alltaf að segja fólki þettan en ég bara nenni ekki að koma þessu á prent!! Fínt að geta bent fólki bara á síðuna þína, sérstaklega þar sem við erum greinilega að aðhyllast sömu fræðin í þessum málum

[Sesselja Fjóla Þorsteinsdóttir, 1.8.2008 kl. 08:52]

Gott að hafa þig hér til að skrifa þetta allt sammen. 

[Ragnhildur Þórðardóttir, 1.8.2008 kl. 09:29]

Sælar skvísur, þakka ykkur fyrir það.  Ég dáist sjálf að ykkur fyrir að sparka í rassinn á lýðnum á líkamsræktarstöðvunum, á meðan ég geri það bara stafrænt.  Við erum allar að vinna saman að sama markmiði:  að stuðla að bættri heilsu landans.