Aðeins meira um vigtina

Eins og flestir lesendur vita er Naglinn að undirbúa sig fyrir bikarmót í fitness í nóvember og hefur undanfarna mánuði einbeitt sér að því að stækka vöðvana og þar af leiðandi stækka líkamann. 
Með auknum vöðvamassa fylgir aukin þyngd, og þetta þykir mörgum, sérstaklega konum, mjög erfitt að sætta sig við.  Þegar nálin færist óðum upp á við setja þær samasemmerki að þær séu að fitna. 
En vöðvamassi er þyngri en fita, og því er óhjákvæmilegt að þyngjast þegar verið er að massa sig upp. 

 

Í framhaldi af pistlinum um að vigtin er lygalaupur ætlar Naglinn að deila með ykkur nokkrum staðreyndum um eigin þyngd.

Naglinn var í sömu þyngd í nokkur ár en er nú 13 kílóum þyngri en aðeins einni fatastærð stærri, og kemst meira að segja ennþá í mörg af gömlu fötunum, með einhverjum undantekningum þó.  Það eru aðallega gallabuxur sem eru of þröngar yfir lærin og sumir þröngir kjólar og bolir komast ekki yfir axlir og bak, enda hefur verið unnið að því að stækka þessi svæði. 

Þegar Naglinn var síðast í þessari þyngd fyrir mörgum árum var Naglinn í tveimur fatastærðum stærri en núna.  Sem segir okkur ýmislegt um hlutfall fitu og vöðva í skrokk Naglans fyrr og nú.

Í síðustu mælingu sem fór fram í síðustu viku hafði Naglinn þyngst um kíló, en sentimetri farið af rassi, sentimetri af vömb, og heilir tveir af mitti.  Lærakvikindin stóðu hinsvegar í stað, en fyrir okkur konur er neðri hlutinn alltaf þrjóskastur.

 

Talan á vigtinni segir okkur ekkert til um hvað er fita og hvað eru vöðvar og þegar við erum komin með góðan grunn af vöðvamassa þá er það bara lögmál eðlisfræðinnar að líkaminn er þyngri en þegar við erum rýrari, hvort sem ásýnd líkamans er feitur eða grannur.  Það er nefnilega hægt að vera "mjór-feitur", þá er líkaminn grannur en vöðvamassinn er lítill sem enginn og fitan getur verið að setjast innan í æðar og á líffæri en ekki á rass og læri eins og hjá þeim sem eru sýnilega holdmiklir.

Það er öllum öðrum sama hvað við erum þung, fólk spáir meira í hvernig við lítum út en ekki hvað við erum þung.  Okkur ætti því að vera nokk sama sjálfum um hvað stafræna kvikindið segir að við séum þung. 

Góð heilsa, hreysti og þrek skipta mun meira máli en einhver tala.

 

 

 

 

 

Athugasemdir

[Audrey, 1.8.2008 kl. 12:09]

Á ekki einu sinni vigt... 

Magnað samt hvað maður pirrar sig á vigtinni, þó maður viti að vöðvar eru þyngri en fita.  Er ekki bara best að miða við fötin sín? ;)

[M, 1.8.2008 kl. 12:29]

Fer aldrei á vigt. Er nefnilega alveg sammála þér varðandi hana. Hún segir okkur ekki allt og fer bara í skapið á mér að standa á þessu apparati. Ég finn það strax á fötunum ef ég hef bætt á mig ( eins og núna) og bjúgurinn mig að drepa eftir flug og vínsull síðustu daga

[Kristjana Ósk (IP-tala skráð) 1.8.2008 kl. 13:57]

ohhh vá þurfti sko alveg á svona pistli að halda núna.. maður veit þetta allt, en alltaf gott að sjá þetta svona svart á hvítu

..og já, hlakka til að sjá þig á bikarmótinu, þú verður án efa SVAKALEG

[Ragnhildur Þórðardóttir, 1.8.2008 kl. 22:33]

Auður! Já alveg ótrúlegt hvað við getum böggast út í þessa græju.

M! Rétt hjá þér mín kæra, fötin og spegillinn eru miklu betri mælikvarðar. Ohh ég þoli ekki bjúginn, fæ alltaf eftir flug og sukk.

Kristjana! Þú sem lítur svo glæsilega út og hefur náð svo frábærum árangri þarft sko ekki að pirra þig á vigtinni. Vonandi veld ég ykkur ekki vonbrigðum á Bikarmótinu, ég geri allavega mitt besta.

[Sesselja Fjóla Þorsteinsdóttir, 2.8.2008 kl. 10:24]

Ég er himinsæl með skrifin þín og er viss um að þau hjálpa mörgum.

[Nanna (IP-tala skráð) 5.8.2008 kl. 11:04]

Við förum alveg bráðum að komast í fötin okkar ;) pre-cut byrjar í dag!