Ávaxtasafar....sykurbombur í felulitum

Ávaxtasykur finnst í miklu magni í djús/safa. Flestir safar innihalda 8-10 grömm af sykri í einu glasi (200 ml).
Ávaxtasykur hefur aðra efnafræðilega samsetningu en strásykur en báðir virka eins á líkamann: of mikið magn er fitandi.

Eitt glas á dag er algjört hámark. Fyrir kyrrsetufólk sem ekki hugsar mikið um mataræðið ætti að takmarka neyslu við nokkur skipti á viku.

Skársti kosturinn er safi með ávaxtakjöti, því þegar það er sigtað frá fjarlægjast mikilvæg snefilefni og vítamín.
Mælt er með að fólk borði frekar ávexti en að drekka safa. Safar metta ekki eins vel og ávextir. Maður er líka miklu fljótari að fá alltof mikinn ávaxtasykur í gegnum safadrykkju en að borða ávexti. Fæstir borða 6 appelsínur í einu, en eiga ekki í vandræðum með að slurka í sig safa frá 6 appelsínum.

Athugasemdir

[Soffía, 29.5.2009 kl. 01:25]

Af því að ég er ólétt og hef misst lyst á mörgu sem mér þótti gott þá hef ég verið að fá mér eina máltíð á dag sem hljóðar svo: 2 kreistar appelsínur, jarðarber, bláber og svo mismunandi hvað ég á en yfirleitt ananas/mangó/blandaðir suðrænir ávextir og mauka þetta svo í blender ásamt klökum ef ég vil hafa þetta næstum frosið.  Er ég að rústa matarræðinu með þessu?   - vona ekki. 

[Unnur Björk Arnfjörð (IP-tala skráð) 29.5.2009 kl. 09:46]

Nei þú ert ekki að rústa mataræðinu með þessu Soffía. Langt frá því.Þú ert með trefjarnar í bústinu, það er ekki það búst og safi. Safinn er bara vökvinn úr ávextinum en bústið gefur þér allan ávaxtasafann.

Ragga þú ert flott, ég er ekkert alltaf sammála þér en mér finnst gaman að lesa það sem þú skrifar :-)

[Unnur Björk Arnfjörð (IP-tala skráð) 29.5.2009 kl. 09:48]

vá hvað setningarnar fóru í rugl... Ég átti við að það er ekki það sama - búst og kreistur safi því þú heldur öllum eiginleikum ávaxtarins í bústinu en ekki í safanum.

Spurning um að fara réttum megin fram úr á morgnanna :-)

[Ragnhildur Þórðardóttir, 29.5.2009 kl. 11:13]

Vatn er drykkur dagsins Jóhanna. Ég mæli ekki með neinu öðru með matnum, nema þá kannski rauðvínsglasi um helgar ha ha...

Soffía, nei þú ert ekki að rústa mataræðinu - þú ert að nota heila ávexti sem er allt annað mál.

Unnur, það er bara hressandi að þú ert ekki alltaf sammála mér, fólk hefur mismunandi skoðanir og meiningar um allt. Takk fyrir innlitið og kvittið.

[Lesandi (IP-tala skráð) 29.5.2009 kl. 11:20]

Hvað með hreint sódavatn einsog hvítan topp eða bláan kristal er það eitthvað sem þarf að drekka í hófi?  Ég drekk eflaust 1/2 til 1 lítra á dag og þess fyrir utan vatn og kaffi.  Er það eitthvað sem ég þarf að endurskoða?