Fat but fit

Það má ekki líta framhjá því að grannur maður er ekki alltaf í góðu formi. Það er mjög algengt að grannir séu svokallaðir “skinny-fat” þar sem fitan sest að mestu leyti á innyfli og það getur verið mjög hættulegt heilsunni og aukið líkurnar á alls kyns kvillum. Þeir sem eru grannir en hreyfa sig ekki eru til dæmis í áhættuhópi á að fá hjartasjúkdóma, alveg eins og þeir sem eru of feitir og hreyfa sig ekki. Maður sem er grannur og hreyfir sig ekki stendur verr að vígi þegar kemur að áhættu á lífsstílssjúkdómum en of þungur maður sem hreyfir sig reglulega. Þeir sem eru þykkir þurfa ekki endilega að vera óhraustir eða í lélegu formi. Það skiptir auðvitað máli hvort umfram þyngd sé í formi fitu eða vöðva. Það kemur ekki nógu skýrt fram í þessari rannsókn aðgreining of þungra eða of feitra. Þeir sem eru með mikinn vöðvamassa geta flokkast sem of þungir skv. BMI stuðlinum. Niðurstöður þessarar rannsóknar benda á að betra sé að meta fólk eftir mittismáli en BMI og má því gera ráð fyrir að þátttakendur hafi verið flokkaðir skv. BMI. Mittismál og fitumæling segir okkur hvernig þyngdin er samsett en ekki BMI. Það sem skiptir mestu máli er að hreyfa sig reglulega, því hreyfingin er sá þáttur sem minnkar líkur á hjartasjúkdómum og tengdum kvillum. Það er hins vegar ennþá hætta á sykursýki þó að maður hreyfi sig en er enn of þungur. Mataræðið skiptir þess vegna alltaf máli, þvi það er lykillinn að því að halda sér í kjörþyngd og halda hlutfalli fitu í líkamanum í lágmarki.

Helmingur feitra hefur hraust hjarta

Athugasemdir

[Dyggur lesandi (IP-tala skráð) 12.8.2008 kl. 22:55]

Sæl,

Þú ert svo dugleg að svara okkur öllum hér á síðunni þinni... ótrúlegt, takk, takk

Freistast því til að skella annarri spurningu á þig, ég er ca 20% fita, 54 kg, 167 cm og 35 ára (jæja þá er ég búin að opinbera mig!!) Er að reyna að koma fituprósentunni niður og bæta við vöðvum. Væri í lagi fyrir mig að drekka Myoplex Diet drykk á kvöldin?  Ég verð oft ansi svöng á kvöldin og á þá til  að detta í sætindin. Ég nota Kreatín fyrir og eftir æfingu og prótein líka eftir æfingar. 

kveðja,

Dyggur lesandi

[Ragnhildur Þórðardóttir, 13.8.2008 kl. 09:13]

Ertu þá að tala um á kvöldin eftir kvöldmat?  Ég mæli ekki með því seint á kvöldin, fáðu þér frekar hreint prótín ef þú verður svöng á kvöldin og þá helst casein prótín sem er hæglosandi og veitir líkamanum amínósýrur yfir nóttina.  Passaðu líka að borða reglulega yfir daginn, þá áttu ekki að finna fyrir hungri á kvöldin.  Það er yfirleitt merki um að hitaeiningaþörf dagsins sé ekki uppfyllt.

Gangi þér vel.

[Bjarki (IP-tala skráð) 14.8.2008 kl. 09:06]

Flott grein hjá þér :)... Það er allt of mikil pressa á að fólk sé bara grannt (óháð því hvernig formi það er í) í samfélaginu eins og það er í dag.

[Ragnhildur Þórðardóttir, 14.8.2008 kl. 11:32]

Takk fyrir það Bjarki.  Það er óþolandi hvernig fjölmiðlar og tískan hefur hyglt undir hinn granna vöxt, og sett samasem merki milli þess að vera grannur og að vera hraustur.  Þarna er svo langur vegur frá.  Þessir grönnu eru nefnilega mjög oft í lélegu formi því þá vantar hinn félagslega hvata til að hreyfa sig, eins og hinir þykkari sem nota yfirleitt hreyfinguna til að verða grennri.  Þannig styrkja þeir hjarta og æðakerfið sem og stoðkerfið um leið án þess að stefna sérstaklega að því.