Ef þú hefur ekki tíma fyrir heilsuna í dag, hefur heilsan ekki tíma fyrir þig á morgun !!!

Hösbandið stundar tuðruspark tvisvar í viku og er það vel.  Nema að fyrir nokkrum dögum sneri greyið á sér ökklann svo nú lítur vinstri fótur hans út eins og hjá konu komin á níunda mánuð meðgöngu, allur bólginn og þrútinn.  Eins og gefur að skilja er tuðrusparkið út úr myndinni næstu vikurnar, sem og veggjaboltinn á miðvikudögum. 

Naglinn benti sínum heittelskaða á að þar sem skrokkurinn fúnkerar fullkomlega ofan sköflungs væri ekkert því til fyrirstöðu að fara í ræktina og lyfta upper body.  Það væri nú ekki hægt að mygla úr hreyfingarleysi þrátt fyrir smá helti.  Til eru dæmi sem Naglinn þekkir þar sem menn á hækjum, spelkum, haltir og jafnvel án útlims mæta harðir í ræktina. 

Naglinn varð þess fljótt áskynja að hugmyndin hlaut ekki góðan hljómgrunn hjá húsbóndanum, eitthvað hummaði í honum og ræskingar og hósti fylgdu í kjölfarið.  Svo klykkti hann út með að segja að þá þyrfti hann að kaupa sér kort, og hann TÍMDI því ekki. 

Naglinn fékk næstum gyllinæð af hneykslun, enda fátt sem Naglinn þolir verr en afsakanir fyrir að fara ekki í ræktina, eina gilda afsökunin í bókum Naglans er að vera dáinn og grafinn.  Allra ömurlegust er að hafa ekki tíma, hver hefur ekki 30 mínútur til að hreyfa sig af 24 klukkustundum dagsins??? Hversu miklum tíma er eytt fyrir framan skjáinn sem mætti nýta í göngutúr??  Að þykjast ekki hafa efni á líkamsræktarkorti fylgir svo fast í kjölfarið í ömurð, og er þyngra en tárum taki að fólk verðleggi heilsuna.  Það er ókeypis að fara út að labba eða gera armbeygjur heima í stofu !!!

Naglinn lýsti því yfir hátt og snjallt að þessi hegðun húsbóndans væri Naglanum til skammar og um þetta skyldi sko bloggað svo öll heimsbyggðin fengi að vita hvers konar aumingjaskapur viðgengist á Sogaveginum.

Hana vessgú kallinn minn..... svo skalt þú díla einn við þína samvisku.   

Athugasemdir

[Mína (IP-tala skráð) 1.4.2008 kl. 10:30]

Þú ert alveg hillaríus  

[Audrey, 1.4.2008 kl. 11:24]

Ohh ég skil hann samt svo vel... en veit auðvitað að þú ert að segja alveg sannleikann.  Það er bara svo auðvelt að vera latur þegar maður er meiddur en svo allt í einu kemur það aftan að manni og hausinn fer í rugl.  Allavega minn.

Vertu góð við hann samt

[Ragnhildur Þórðardóttir, 1.4.2008 kl. 11:37]

Hreyfingarleysi er bara ekki liðið í húsakynnum Naglans og hann veit það en óhlýðnast samt og það fer í taugarnar á mér .  En ég verð ekkert rosalega vond við hann... ég lofa

[Guðrún Helga (IP-tala skráð) 1.4.2008 kl. 14:55]

Heyr heyr!!!! spurning um hvort að þetta sé Bollagötuveiki??? Ég þekki nefninlega mann sem er slæmur í hnénu og á við hann samtal af sömu tegund all reglulega.... með engum árangri.

[Ingunn Þ. (IP-tala skráð) 1.4.2008 kl. 15:25]

Hehehe...þú átt alla mína samúð Snorri minn Það leynast víðar letihaugar

[Ragnhildur Þórðardóttir, 1.4.2008 kl. 16:01]

Guðrún Helga!  Já það er spurning hvort einhver pest sé að ganga í Norðurmýrinni?  Letipest kannski ???  Og þeir eigandi svona konur, að fá ekki samviskubit yfir að vera svona haugar !!!!

Ingunn!  Þakkaðu fyrir að vera ekki gift Naglanum, annars fengir þú sömu útreið.

[Sesselja Fjóla Þorsteinsdóttir, 2.4.2008 kl. 07:25]

Alltaf gaman að lesa bloggið þitt.

[Anna María (IP-tala skráð) 3.4.2008 kl. 09:30]

Haha.. eru reglur hjá naglanum? Snorri getur þá ráðfært sig við Gunna sem er bugaður af reglum..... þó er engin þeirra um hreyfingu  Kannski er spurning um að fara að endurskoða reglurnar og bæta kannski við.

En batakveðjur til Snorra.... ekki gaman að lenda í þessu.

[Ragnhildur Þórðardóttir, 3.4.2008 kl. 11:05]

Til hamingju með afmælið sæta !!

Jú jú það er ein ófrávíkjanleg gullin regla meitluð í stein í Casa de Nagli og það er að hreyfa á sér rassgatið .  Það má drekka af stút, og þurrka gólfið með borðtuskunni en hreyfingarleysi er ekki liðið.  Skila batakveðjunum .

Sjáumst á morgun í saumó skvís!