Taktu á því kelling!!

Til þess að skerpa á umfjöllunarefni síðasta pistils vill Naglinn koma með smá fræðilegan pistil um lyftingar og konur til að vonandi hrekja burt þessa bábilju um að konur verði útúrmassaðir kögglar með lyftingum einum saman.

Í bæði konum og körlum eru hormónar sveimandi um blóðrás.  Testósterón, estrógen, prógesterón, DHEA.  Bæði kynin hafa öll þessi hormón en í mismunandi magni þó.  Karlar hafa mun hærra magn af testósterón og DHEA en konur en þær hafa hins vegar hærra magn af prógesterón og estrógeni.  Það fer eftir einstaklingnum, en að jafnaði hafa konur hafa u.þ.b 10- 30 sinnum minna af testósteróni í líkamanum en karlmenn.

Testósterón er mjög öflugt hormón.  Það er einn helsti þáttur sem gerir karlmönnum kleift að byggja upp vöðva.  Það eru hins vegar til konur sem lyfta lóðum og líta út eins og karlmenn.  Það er ekki vegna þess að þær eru að lyfta of þungt, heldur eru þær einfaldlega að innbyrða testósterón og vaxtarhormóna sem hjálpar þeim að líta svona út.

Meðalkonan sem lyftir þungt verður ekki ofurmössuð og mun ekki líta út eins og karlmaður ef hún sleppir því að sprauta slíkum efnum í sig.  Þessi ofurhræðsla við þungu lóðin er því óþörf.

Samfélagsleg viðmið geta haft áhrif á þessa hræðslu kvenna við að taka á járninu.  Það var ekki fyrr en á sjöunda áratug síðustu aldar með frumvarpi um jafnan aðgang allra að íþróttum að konur í U.S.A fengu tækifæri til íþróttaiðkunar til jafns við karlmenn.  Þá fyrst fóru konur að taka á því fyrir alvöru.  En þó að liðin séu rúmlega 30 ár eru því miður ennþá við lýði staðalmyndir karla og kvenna, þar sem karlmenn eiga að vera stórir og sterkbyggðir en konur smáar og fíngerðar.  Margar konur hamast því við að hora sig niður í kroppað hræ með endalausum cardio æfingum og fuglafæði, og snerta ekkert nema bleiku lóðin af ótta við að taka meira pláss í heiminum.

Hins vegar er það jákvæð þróun að fleiri konur sjást nú í tækjasalnum en áður fyrr, og er það sérstaklega jákvætt í ljósi þess að styrktarþjálfun er eitt helsta vopnið í baráttunni við beinþynningu síðar á ævinni.  Bein þola um 10 sinnum meira álag en líkaminn veitir þeim daglega.  Því meira álag sem við veitum þeim með styrktarþjálfun, innan hóflegra marka þó, því meira styrkjast beinin.  Hámarks styrktar aukning verður þegar þyngdir og ákefð eru stigvaxandi þjálfunaráreiti. Sama lögmál gildir um brjósk, liðamót og sinar en því sterkari sem þau eru því minni líkur á meiðslum, liðagigt og mjóbaksverkjum.

 

Nokkrir ávinningar styrktarþjálfunar fyrir konur *:

 

• Styrkir ekki bara vöðva heldur einnig bein með því að auka steinefni í þeim.
• Sterkari vöðvar styðja betur við beinin og þannig getur aukinn vöðvamassi minnkað líkur á beinþynningu.
• Sterkari bandvefur sem leiðir til stöðugri liðamóta og minnkar þar með líkur á meiðslum, gigt og bakverkjum.
• Aukinn vöðvamassi (virkur vefur) og minni líkamsfita (óvirkur vefur)
• Aukin grunnbrennsla vegna aukins vöðvamassa og minni líkamsfitu
• Aukið sjálfstraust og betri sjálfsmynd
• Betri sjálfsmynd og sjálfstraust getur dregið úr þunglyndi og rannsóknir hafa sýnt að þjálfun dregur úr einkennum depurðar hjá þeim sem stunda reglulega þjálfun.

Athugasemdir

[Óla Maja (IP-tala skráð) 11.3.2008 kl. 18:57]

Heyr heyr!

Næstsíðasti punkturinn er það fyrsta sem ég fann fyrir þegar ég fór að stunda ræktina og seinna áttaði ég mig á þessu með síðasta punktinn á listanum þínum (og hef sannreynt það aftur og aftur). Góð hreyfing er hið besta geðlyf - það er staðreynd  

Það er líka langt síðan ég las fyrst um hvað það væri gott fyrir konur að lyfta þegar aldurinn færi að færast yfir vegna beinþéttni ekki síður en fyrir vöðvastyrk. Skil ekkert í því hversu margir hafa ekki ennþá kveikt á slíkri staðreynd!

[Ragnhildur Þórðardóttir, 12.3.2008 kl. 09:03]

Hreyfing er allra meina bót...andlega sem líkamlega  maður er svo miklu léttari í lund þegar maður hreyfir sig reglulega.

Ég er einmitt alltaf að skamma múttu fyrir að fara ekki í ræktina því hún er einmitt komin yfir miðjan aldur og borðar ekki nóg kalk og þyrfti því nauðsynlega að lyfta til að herða beinin.... en ég tala því miður fyrir daufum eyrum  

[M, 12.3.2008 kl. 09:46]

Finnst ansi hart þegar Naglinn er farinn að troða sér í drauma mína. Já dreymdi þig í nótt (skrítið og við höfum aldrei hist)  en þú varst góða mín að vinna Íslandsmót í vaxtarrækt !!  Hvort það sé á eitthv. gott fyrir þig eða ekki, þá dreymdi mig þetta samt.  Ég var í öðru sæti nei nei djók hehehe

Eigðu góða dag Íslandsmeistari ! 

[Ragnhildur Þórðardóttir, 12.3.2008 kl. 10:40]

Jahérna hér  Naglinn treður sér allsstaðar.... ekki væri nú leiðinlegt ef þú værir berdreymin mín kæra M.  Eigðu góðan dag sömuleiðis, og megi þig dreyma vel næstu nótt